السبت، 18 مايو، 2013

أنتم ... أنا .... بلوجر ... بــ التلاتة





صبـــــــاح الورد ... أو مساء الورد 
أى كان توقيت البوست :)



النهاردة عيد ميلاد مدونتى ( قلب القطة )
العيد الثالث ياعنى 3 سنين 

هما عدوا بسرعة جداااا انا فاكرة أول يوم وأول تدوينة 




ودى كانت أول علاقة ليا بالنشر فى التدوين وأول علاقة ليا بالكتابة وأول حاجة كتبتها فى حياتى وكانت من 4 سنين تقريبا 

مرورااااااااا ببلالالالالالالالالاوى سودة الحقيقة أنتم أستحملتونى كتير وليكم الجنة والأجر والثواب من الله هع 
 لحد أخر تدوية أتنشرت وهى مش أخر اللى أتكتب أنما أخر أللى أتنشر 



أنا حبة جدا انى أسجل فى المدونة النهاردة التأريخ دا وحبة إنى أشكركم كلـــــــــــــــــكم من كل قلبى بمنتهى الصدق 
كلـــــــــــــكم دى بقصد بيها فعلا كل اللى زار المدونة من أول بوست لأخر بوست الناس الجميلة اللى كنت معها فى تواصل دائم وأنقطع التواصل بسبب عدم المتابعة واشغال الدنيا والناس اللى زيارتها كانت خفيفة ومش متكررة والناس اللى لسة بتحاول تتابعنى كلكم اتعلمت منكم كتير منكم كأشخاص على المستوى الأنسانى أو على مستوى الكتابة طبعا وحقيقى لو فى أى تقدم فى أسلوبى لو أعتبرت أن ليا اسلوب فى خواطرى اللى لا تتعدى كونها خواطر فالفضل حقيقى ليكم ولكتابتكم ولقرأتى ليكم 
أنا لسة بحاول أتعلم ولسة بعتبر نفسى ضعيفة أو ضايعة فى اللغة العربية اللى بحبها جدا بس بحاول أحسن وأجود علشان خواطرى بقدر المستطاع تكون فى افضل صورة ممكن اقدر اوصلهلكم 

التدوين عالم جميل انا كسبت كتير لما دخلته بالصدفة ولما حابيبى فى التدوين وقتها فضلو يلحوا انى افتح مدونة الحقيقة ليهم كل الفضل وكل التحية منى 

قابلت ناس كتير فى التلات سنين دول فيهم ناس حبتهم وحبونى بس مافهمونيش ومافهمتهومش وفيهم ناس حبتهم وماحبونيش وفى ناس ماحبناش بعض بس بحترمتهم ومازلت وفى ناس بتعامل معاهم من غير اى معرفة ورسملهم صورة ذهنية معينه وبحبهم جدا واكيدا وصلهم  وفى ناس حبتهم وحبونى وفهمنا بعض ولسه مستمرين فى صدقتنا مع بعض واقصدى فى دا البنوتات طبعا :) وفى ناس عزتهم وبحترمهم جدا بس للاسف ظروفى تمنعنى من التواصل معاهم لكن مكنتهم محفوظة عندى
المهم اقتنعت ان مش لازم ابدا ان حد يعجب كل الناس بقى عندى افق اوسع واستيعاب اوسع للبشر واختلافتها 
 فى شخصيات  فى التدوين أثرت فيا جدااااااااااا سواء على المستوى الشخصى أو على مستوى القراءه والكتابه كمان 
فى التلات السنين دول أتعلمت كتير ههههههه اضربت على قفايا كتير وبردو ضربت ناس على قفاها بس مش كتير والله هههههههههه بجد 
لسة بزهق من الاسقاطات فى كتابتى على حياتى الشخصية فحتتتتتتت بضايق جدا لما اكتب حاجة مفرحة او غم ووجع  وتتاخد عليا !!!! 
هو مش المفروض اننا بنكتب للكتابه حالات اى كانت عشنها او شوفنها او قرأنها !!!!!!!!!!
هو احنا فتحين شباك من المدونة على اؤدة الصالون ولا ايه :) ؟؟
  إلا اذا طبعا كان بوست واضح ومعلوم ومنوه عنه انه شخصى مثلا دى حاجة تانيه خالص ..


التدوين ما زودنيش ثقة بنفسى لانها كانت موجودة ومازالت الحمد لله انما ادانى انتم وادانى صديقاتى الجميلات الاسعات العسولات اللى بموت فيهم وهما الاقرب لقلبى لدرجة انهم سكنينه حقيقى وهما عارفين دا كويس :)

وكما التدوين خلانى أكثر أطلاع غصب عنى علشان اشوف اتجاة الدنيا فين وكمان أقوى اللغة وساعدنى انى أعرف عايزة ايه واتجاهى ايه هو ساعد فى تكوين برواز يحدد الصورة فعلا 
انا دلوقتى بدرس اعلام وماقدرش انكر ان للتدوين فضل كبير لفكرة دراسة الأعلام حقيقى 

ايه اللى جاى ؟؟؟ ماعرفش انا حد عايش كدا مافيش خطط  لان الحياة ابسط من التخطيط ليها هكتب ايه تانى ؟؟؟ ماعرفش لانى لسه برتجل فى الحال واللى بحسة بكتبه ؟؟؟ عندى افكار كتير لكتابة قصص بس طبعا مستحيل تحصل لانى ماليش خلق للكتابة الطويله   ... هل المدونة هتستمر او لاء خلال السنة دى ؟؟ الله اعلم مافيش شىء بيدوم الا وجه الله هيجى عليها يوم وتتقفل بس امتى وليه ؟؟؟ بردو الله اعلم 

انا مش هقول اسماء انما انا بهدى عيد ميلاد المدونة لكل حابيبى وهما عرفين نفسهم ولكل زوار المدونة ولكل حد كتبلى حرف هنا بمنهى الامانة والحب للجميع 


انا مسامحة اى حد فى اى حاجة واتمنى ان اى حد زعلته او ضايقتة بقصد او بدون قصد يسامحنى ياعالم من هنا للسنة الجاية هيحصل ايه وحقيقى الدنيا مش مستهلة اى زعل من حد او اى خلاف على شىء

وطبعا مش هنسى مسك الختام السيد أنور ابويا حبيبى 
بابا لو فى لسة اى شىء كويس انا بعملة فى حياتى فأنت السبب فيه  بحبك يا ابويا اوووووووى 

وكل الحب والتقدير من قلبى ليكم انتم كمان كلـــــــــكم

كل سنة وأنتم وأنا وبلوجر وقلب القطة  بألف خير يارب 
:)            

وبشكركم تانى لانكم استحملتوا وقرأتم البوست الرخم دا لانه ارتجالى بردو ومن غير تخطيط :)






 وادى التورتة  علشان محدش يقول الاسكندرانية بخلا :)



 وادى تورتات اكتتتتتتتتتتر علشان well ياكل براحتة وبردو ماحدش يقول الاسكندرانيه بخلا هع هع 


ودى قطاقيط  حبيبة قلب القطة فاتيما :)

  
 

هناك 24 تعليقًا:

well يقول...

تبعاً لتوقيت قراءة البوست "مساء الفل عليكى يا ريتشارد"
وكل سنة ومدونتك منورة شاشتى المتواضعة ..
انا فاكر ايام ماكنتى بتعلقى فى المدونات وكنتى لسه ماعملتيش مدونتك .. زكريات ..بصى يا ريتشارد فى مدونات هى اللى بتجذب الناس وفى شخصيات هى اللى بتجذب الناس ..انتى جذبتى الناس بشخصيتك المصبوغة بلون "السيد انور " رحمه الله ..وجذبتى الناس بمدونتك " قلب القطة".. اللى بعتبرها القلب الابيض
.."هيجى عليها يوم وتتقفل بس امتى وليه " ليه الرخامة دى تقفليها ليه بس.. المدونة صحيح انتى بس اللى بتكتبى فيها لكنها مش ملكك انتى لوحدك هناك شركاء فى التعليق ...
" واتمنى ان اى حد زعلته او ضايقتة بقصد او بدون قصد يسامحنى"هى ريتشارد ممكن تزعل حد ..اممممممممممممم .. تؤتؤ ماظنش ..
كل سنة وانتى طيبة يا ريتشارد ومدونتك طيبة وحبيت اقولك فى هذه المناسبة تورتة واحدة لا تكفى .. لان مدونتك ليها متابعين كتير .. هتلاحقى عليهم منين ..!..ومتنسيش تتوصى بيا فى التورتة
تحياتى بمليون سلام

موناليزا يقول...

كل سنة وانتي ومدونتك بخير
تمنياتي بالتوفيق في دراستك في مجال الإعلام

وبهذه المناسبة عندي استفسار بسيط
وهو اني فاكرة اننا كنا عند بعض على الفيس وحالياً مش لقياكي
فياترى احنا كنا مع بعض في جروب مثلا والجروب اتحذف
ولا كنا عند بعض والاكونت بتاعك غيرتيه
ولا مكناش أصلا وأنا بيتهيألي :)

momken يقول...

......

كل سنه وانتى ومدونتك بخير يا مارو
وتفضلى منوره بلوجر بجدعنه واصاله وعفويه
اهل اسكندريه
وعقبال ميه سنه كتابه وابداع
تحياتى

.......

أحمد عبد الحميد يقول...

كل سنة وإنت والمدونة طيبين

P A S H A يقول...

كــل سنــة وانتي ومدونتك طيبين وبألف خير وسعادة ودايماً منورة البلوجر :))

فاتيما يقول...

كل سنة وانتى قطاقيطو الحلوة
الطيبة
الشقية
الناعمة
المخربشة اذا لزم
والرقيقة دايما وابدا


زى كل الحبايب ما قالوا فوق
كل سنة وانتى والمدونة بخير
وتفضلى وسطنا
وربنا يعلى مقام عم أنور ف الجنة بدعواتك الحلوة ...


كل سنة وانتى طيبة
:-*
احنا اللى ف الصورة دى
قططات غلابة والنبى
:)

http://cdn.followpics.com/show/20195898299204425_KEOVivCT_c.jpg

well يقول...

هههههههههه .. كل دى تورتات كتير اوى كدة يا ريتشارد ... .
"الاسكندرانيه" اجدع ناس .. ناس تمام
..
القطاقيط (فاتيما اند ريتشارد )منورين الشاشة ...
..

ندى الربيع يقول...

كل سنة وانتى طيبه وبخير دايماً
أتمنالك التوفيق ؛؛

الازهرى يقول...

3 سنين بس ؟؟؟؟؟؟؟؟؟

ياااااااااااااااااااااااه
إنت من عمر ابنى الوسطانى بقى :)

عقبال ما يبقوا 30 سنة يا رب

صباحك ثكر :)

عاشقه الرومانسيه يقول...

كل سنه وانتى طيبه
تعيشى وتعلمى وتتعلمى :)
انا من الناس اللى بتستمتع بكتاباتك وان كنت مش باعلق على المدونه لكن رايى بيوصل لك عن طريق الفيس
ربنا يديم المعروف بينا ويسعد قلبك ويجعل كل ايامك اعياد

richardCatheart يقول...

ويل يا ويل صباحك فل


ههههههههههههه تعليقك بسطنى اوى يا ويل انت عارف انك من الناس اللى ليها معزة عندى خاصة جدا يمكن عمرنا مااتقابلنا فى تجمع مثلا لكن حقيقى من اول يوم علقت عندك وانت بقيت اخ عزيز جدا فاكر يا ويل بوست الشباك اللى انت كنت كاتبته :) من تلات سنين وانا بفكر اكتب بوست عن الشباك بسببك ههههههههههه
كانت ايام جميلة اوى

وبعدين انا بنى ادم باكل وبشرب وبكون شريرة احيانا وبزعل ناس منى فضلا ان لسانى 67 متر بس بحاول انى ما اكونش كدا كتير اصل الدنيا مش مستهله يا ويل


انا بشكرك اوى وانت اللى شرفت مدونتى البسيطة والله وبجد وربنا يديم بنا كل ود ومعروف يا ويل وديما فى تواصل جميل ومستمر واسمع عنك كل خير يارب
وانت طيب وبهنا وسعادة اللهم امين :)

richardCatheart يقول...

موناليزا

وانتى طيبة يا منى يارب وفى احسن حال اللهم امين ومن جميل لاجمل واجمل يارب


اه كنتى عندى فى اكونت كات هارت واتقفل لظروف شخصية الحقيقة وفتحت واحد تانى وضفتك فيه واتقفل لنفس الظروف بردو الحقية لحد اخر اكونت ماعرفتش اضيف فيه كل البنوتات فضلت كل ما امشى اعطر فى حد اضيفة لحد ماحصلت نفس الظروف وتوقفت للاسف عن الاضافة :( وعادى مازلت الظروف مستمرة والحمد لله على كل شىء

انا بشكرك جداااااااااااااااا على اهتمامك وانا لسة متابعة ليكى قدر المستطاع

كل سنة وانتى وكل احباك بالف خير يا موناليزا :)

richardCatheart يقول...

ممكن ...

اخى وصديقى العزيز :) وانت بالف خير وسعادة يارب يا ممكن وديما فى احسن حال وديما ممتع لينا بحروفك وابداعك المختلف واحساسك العالى

الف تحيه وسلام ليك من البحر وأهله كلهم :)

نهارك فل يا فل :)

richardCatheart يقول...

احمد عبد الحميد

ازيك يا ابو حميد :) اشكرك ويارب انت وكل اسرتك الجميلة بالف خير واحسن حال اللهم امين :)

richardCatheart يقول...

باشا الباشا

وانت طيب وبلوجر منور بك وبكل حابيبنا ياشريف ويارب انت واميرة ويس فى احسن حال اللهم امين سلامى كتير ليهم وبوسلى الواد ياسوا حبيبى :)

richardCatheart يقول...

تيما فاتيما روح قلب القطة :)

صباحوا عسل يا عسل :)

ربنا يخليكى ليا يا تيما ويفرح قلبك ويقر عينك ويريح بالك يارب انتى طلتك عليا بالدنيا والله

القطاقيط دول انا وانتى ههههههههههه احلى قاطيط فى الدنييييياااااااااااااا

مش هتبطلى تدلعينى مهما مر وقت :)

ربنا مايحرمنيش منك ابدا ويطمنى عليكى بكل الخير يارب
بحبببببببببببك يا ست انتى :)

richardCatheart يقول...

ويل

:) انا قولت بئا انت عمرك ماطلبت شىء منى ويوم متطلب اتأخر ؟؟؟ وبعدين انت غالى والطلب رخيص خلى الشعب يهيصصصصصصص :)

شوفت بئا تيما هى دى تيما لما بتحب حد بيبئا الدلع كله كله ربنا يخليهالى يارب :) ويخليك يا ويل :)

richardCatheart يقول...

ندى الربيع


وانتى طبيبة يا حببتى يارب ويارب التوفيق لكى انتى كمان بكل الخير ان شاء الله

richardCatheart يقول...

الازهرى

هههههههههه طبعا يا بابا اسامة لثة مطلعة الثنان اهو حتى ثووووووف ههههههه


ربنا يخليك يا اسامة ويارب ديما بخير وطيب وربنا ساعد قلبك بالخير يارب
ويارب 30 سنه وكلنا مع بعض وبخير يا سمسم :)

richardCatheart يقول...

دودو

ادينا عايشين وماوراناش غير العلام يا عم علام :)

ربنا يخليكى يا دودو ويارب يسعد قلبك ويفرحنى بيكى وانتى فى احسن حال :)

الازهرى يقول...

طبعا نا عارف إن حضورك صعب مع إننا نتمناه

بس الحمد لله على كل حال
بس شاركينا الدعوة


http://fritend.blogspot.com/2013/05/blog-post_20.html

بوست لله يا أولاد الحلال

richardCatheart يقول...

عنيا يا اسامة طبعا

انا فعلا شيرت على الفيس وهنشر هنا ان شاء الله ربنا يقويكم ويكون يوم طيب

Deyaa Ezzat يقول...

مسااااااااااااااااااء الجمال

باعتذر إني ماكنتش موجود يا مارو $:


كل سنة و(قلب القطة) طيبة وانتي بخير دايما

عقبال السنة ال 127 D:

richardCatheart يقول...

ضياء

وانت طيب وديما من جميل لاجمب يا ضيا ياااااااااااااارب وكتييييير الرقم دا كفايه عليا كمان سنة بس قول ياااارب :) مافيش ابدا داعى للاسف دا مكانك وانت شرفة ونورة بزيارتك حسب ظروفك الله يعينك يارب :)