الأحد، 24 مارس، 2013

أنا ......!




أنا أنا المجروح


أنا اللى مملكش حق البوح
أنا اللى مالوجع خرس 

ويوم ماجيت أقول الآه 
صوتى ماانطلق وطلع مبحوح 

أنا أنا الموجوع 

وساكن جوا الوجع بحرر دموع
أتسرق الفرح منى وماله رجوع
ولما جيت أقول الآه
لقيت الصوت ماله طلوع
أنا اللى اتحبس فقفص دهب وقالوله غنى
أغنى ازاى يابشر وأنا مبتور الأمل منى
والوجع ملو الضلوع

أنا أنا الحيران 

فشوارعها وموانيها
الملم خيوط الفجر وأغزل شال أمانيها 
ومهما ناويت الرجوع تخدنى التوهه من تانى
قتلنى برد حواريها وبكتنى حكاويها
أنا الحيران مابين أغانيها وقضبان على بابى
تزيد من حيرتى وعذابى ومش مالك أدفيها

أنا أنا الحزنان

وتيجى الضحكة على بابى ولا شوفهاش
ولما الوردة بتفتح مابعرفهاش
أتارى الحزن حابسنى فى نظرة أزاز
وأداوى الناس بفرح الكون وأنا المدبوح 
وأقول فغناوى وأعيد فى الكلمة والموال 
وأدق الفرحة فقلوبهم بكلام ينعاز
وأنا موالى ﻻهو منعاز وﻻ مسموع
عشان فالأصل كان مجروح كان موجوع

هناك 10 تعليقات:

ظلالي البيضاء يقول...

حزن مدفون وألم ووجع وجد لنفسه ثقباً للخروج منه بغصة قلب ودمعة عين ورجفة قلم ..
كل التحية لحرفك المحزون ..

ابراهيم رزق يقول...

سلامتك من الوجع و الجرح و الحزن يا مارو

ايه لونك غامق قوى انهارده
يارب يكون خير

كلماتك جميلة رغم الحزن و الوجع اللى بداغلها
الا ان متغطية بالشجن

صباح الفل على شط اسكندرية

تحياتى

faroukfahmy58 يقول...

صباح الفل مارو الجميلة على شط الاسكندرية
قبلنى برد حواريها
ادارى الناس بفرح الكون وانا المدبوح
حزن مدفون والم بوجوع
سلامتك من كل سوء ياريت برد الشط يهدئ مما انت فيه يا ست بنات بحرى

SHARKawi يقول...

طبعا هيا جميلة جدا . رغم طبعا كمية الألم والحزن الموجود جواها . بس تفضل مرتبة ومنسقة ومكتوبة باحترافية جدا . ولها مذاق واحساس واصل بسهولة وبساطة .

تقبل كامل احترامي وتقديري. تشكراتي .دعواتي . لك مني تحياتي

well يقول...


نوع الخط اللى مكتوب بيه البوست ده واللى قابله بيجى عندى الكلام راكب على بعضه .. مش عارف ليه

أنا أنا الحيران
فشوارعها وموانيها الملم خيوط الفجر وأغزل شال أمانيها ومهما ناويت الرجوع تخدنى التوهه من تانى قتلنى برد حواريها وبكتنى حكاويها أنا الحيران مابين أغانيها وقضبان على بابى تزيد من حيرتى وعذابى ومش مالك أدفيها
100/100 لما بقراها بحس انى مش عارف اعمل(وقوف ) وارجع اكمل
كأن الكلام ده نغمة لكلمة واحدة لازم تتقال من غير تقطيع ابدعتى
موالك جميل جميل يا ريتشاردوصباحك فل.. تحياتى

افكار مبعثرة يقول...

"ومهما ناويت الرجوع تخدنى التوهه من تانى"
جميلة رغم الوجع و الحيرة و الحزن اللي بتنطق بيه الحروف
تحياتي

P A S H A يقول...

رغم إنها نكد بس جميلة أوي بجد
:)
تسلم الأيادي

الازهرى يقول...

فكرتينى بدى

http://fritend.blogspot.com/2013/03/blog-post_1519.html

كتبتها من اسيوع تقريبا

richardCatheart يقول...

صباحكم خير وهنا

اوﻻ ياعنى انتم فجأتونى بالزعر والقلق فى ردودكم :-) ربنا يعزكم بس انا مستغربة هى اﻻحداث العامة باﻻصافة للخاصة فيها ايه يبسط الدنيا كلها تجيب اكتئاب حاد ومش ليا لوحدى الحقيقى :-)

ظلالى بيضاء ،،،،
صباح النور :-) كل التحية لوجودك الجميل اشكرك جدا

ابرابراهيم رزق ،،،،،


معلش يابراهيم اصلنا طبخين قلقاس والطبيخ الغامق بيقلب معايا ::-) تسلم يارب من كل سؤ ويارب ديما بخير صباحك فل ياابراهيم


الفاروق العزيز ،،،،،،
يسعد صباحك ياحلو :-) حصل يافندم وروحت للبحر وهدانى :-) ربنا يعزك واتمنى ليك كل طيب يارب منورنى




شرقاوى ،،،،،،،،،

صباحك ورد اشكرك جدا وسعيدة انها عجبتك جدا جدا :-) والله الوجع مابقاش فى الحروف بس دا بءا عادة يومية بتمارسنا :-)
اسعدنى وجودك اوى ونورتنى وعلى فكرة ووصفك بالاحترافية كتير عليا دا من ذوقك


ويل يا ويل ،،،،
صباحك فل يا ويل موصوع الخط دا ﻻنى باخد الكﻻم موبى بيست من الفيس ﻻنى بنشر هناك اﻻول وبحطه قى البوست انا ظاهر عندك زى ماهو ظاهر عندى جوا فى الاعداد لرساله جديدة معلش ﻻنى بدخل من التابليت ﻻن الﻻبتوب باظ ومش بعرف النسق منه كويس بس هاحول اظبط بعد كدا قدر المستطاع ... الجزء دا انا كتبته على بعض وحتى لما بقوله بيكون على بعض كدا يبئا وصل زى ماحاسته :-) ربنا يخليك يا ويل وابئا افتح التعليقات علشان اعرف اغلس عليك :-)


افكار مبعثرة ....
صباحك جمال يأحلى اﻻفكار ألمبعثرة اشكرك اوى ويعيدة بوجودك ويارب يبعد عنك اى وجع :-)


باشا ياباشا ،،،،،،

انا عارفك تموت فى النكد ياشريف ههههههه صباحك هنا وتسلم يا ابو يس منورنى :-)


اﻻزهرى ،،،،،،

صباحك نادى يا اسامة روحت وقرأتها :-) جميلة اوى اوى وفعﻻ فيها منها بس انا بتاعتى على غامق اكتر هههههههههههه منورنى يا اسامة ويارب ديما :-)


م

عمرو يسرى يقول...

وساكن جوا الوجع بحرر دموع أتسرق الفرح منى وماله رجوع ولما جيت أقول الآه لقيت الصوت ماله طلوع أنا اللى اتحبس فقفص دهب وقالوله غنى أغنى ازاى يابشر وأنا مبتور الأمل منى والوجع ملو الضلوع

الله الله جميله جدا جدا جدا بالرغم من حزنها