الثلاثاء، 26 أبريل 2011

دربــــــــــــــــــــــــــــــــــــــكه





ميزه كبيره اوى انك تحب الدنيا وتدخل فيها بصدرك من غير خوف

انا اساسا بكره احساس الخوف وطول ما انا خايفه ببقى متوتره وبكره نفسى













هو ليه ديما الضربه بتوجع من الاقرب ؟؟؟؟؟؟؟؟؟؟؟؟؟؟؟؟؟
لان علميا القرب فى المسافه والاحساس بيدى قوه للضربه اكتر من البعد فى الاحساس والمسافه فايكون الالم مكثف









لما تفكر فى المقربين منك جدا بتكون على ثقه عمياء  انهم اكثر مخلوقات ربنا حب ليك كما انت

مهما كنت انسان عقلانى مستوعب وفاهم ثقافه الدنيا وديما تردد ان دوام الحال محال

الا انك بردو بتتصدم فيهم صدمه عمرك يمكن لانك ديما معاهم كنت مغمض

وديما معاهم بتتكلم بأعلى صوتك وانت مرتاح ومتخيل انهم مقدرين وفاهمين ومستوعبين

وخصوصا لما بتسمع منهم كلام حلو وجميل بأحساسهم المفرط بيك

وتكتشف فاجأه ان ماكانش فى اى احساس بيك كلها فض مجالس ودمتم

 المواقف خير برهان من الكلام لان الكلام سهل











هانفضل نمر بتجارب  سيئه كتير لان دا حال الدنيا وهانفضل نحب ناس تدينا على قفنا  لان دا بردو حال الدنيا

وهانفضل نحاول ونحاول ونحاول
لاننا عايشين فى الدنيا

هانضرب على قفنا وهانضرب بردو ناس على قفاهم حتى لو احنا مش اشرار
ومانقصديش لان بردو هو دا حال الدنيا

ولاننا مش ملايكه بأجنحه عادى ياعنى كلنا خطأين وخيرنا التوابين









كلنا بنمر بمشاكل ماديه اجتماعيه
بس اصعبها المشاكل الانسانيه
اثرها قوى مابيروحش بسرعه
ويمكن حتى مع الوقت بتتغطى بس بتفضل موجوده

علشان كدا لازم الحياه تستمر رغم عنا ورغم بوختها وتقل دمها
بس لازم تستمر عادى








اسأل الله عز وجل ان يفك كرب كل مكروب
ان يشفى كل مريض
ان يريح النفوس والقلوب



اهداء هذه الكلمات لنفسى ولاخى هيثم السايس

هاترجع  لنفسك يا ابو الهيثم بس ماتستعجلش

وحده وحده





هناك 26 تعليقًا:

لـــولا وزهـــراء يقول...

مـــــــــارو

هى التعليقات عليها اشراااااااف ليه هو احنا بنخاف ولا ايه هما برضه اهل اسكندريه يعرفوا الخوف " وش بيغمز "
بصى يا قمر لولا وجود الالم عمرنا ما هنعرف قيمة الفرح والسعاده

الحياه كلها الوان واصناف من البشر فيهم الطيب والشرير واحنا كمان جوانا الخير وكمان الشر وهنضفل نجرح ونتجرح وعادى طريقنا ولازم نمشى فيه المهم اننا نكون احنا بجد ومش نحاول نقلدى اى حد ومهما شوفنا تفضل رحمة ربنا التى وسعت وتسع كل شئ
هو ايه الكلام الغريب العجيب اللى باقوله ده واضح ان عنوان البوست دربكه خلى دماغى دربكه وهى اصلا بايظه لوحدها

ادعو الله يهب للجميع الخير والسعاده وراحة البال وان يفرج الهموم
دعوه مخصوصه لهيثم السايس ربنا يطمن قلبنا ويريح بالك
اما بقى الدعوه الاخيره هى لكى يامارو ربنا يهب لكى خير على قدر نيتك الطيبه

دعواتى بالسعاده لكى ولكل احبابك

زهـــــراء

SHAPE YOUR LIFE (ABOALI) يقول...

بعد لما قريت البوست مش عاوز اعمل احتلال. بس ليا. كمان تعليق. على. روقة. بعدين.

ستيتة حسب الله الحمش يقول...

في ضربات تقوي
وفي ضربات تهد
لكن الأغلب الأعم
وخاصة من الحبايب
ضربات تعزل
لا إراديا ومع الوقت تلاقي نفسك عاوزة تعيشي بأقل قدر من الخسائر
او بمعنى اصح مبقتيش مستحملة خسائر اني لأن اللي جاي مباشرة معناه قلبك يقف
فتكتفي بدائرة ضيقة جدا - لا إراديا - وتقاومي
مش عارفة قلت ايه
وده لأني مش على مستوى القاعدة
ها اقعد كويس واقرأ تاني :)

SHAPE YOUR LIFE (ABOALI) يقول...

هههههههههه. نسيت. أنى. المدونة. عليها. مراقبة. سلام. مؤقت يا انسان

أم هريرة (lolocat) يقول...

السلام عليكم

اولا اشكرك جدا لانك استعنت بصور للقطط :) فعلا هى ارق حيوان

اما موضوع هيثم بصراحة انا ملاحظة غيابه من مده بس مش اعرف الاسباب ربنا معاه لو فيه مشاكل وييسر له الامر كله فهو انسان مهذب ومحترم ومدون ناجح ورائع

كلماتك فكرتنى بابيات تتكلم عن الضربة والالم لما تكون من قريب

علمته الرماية
فلما اشتد ساعده رمانى
وكم علمته نظم القوافى
فلما قال قافية هجانى

صعب الاحساس بالألم لما بيكون من اقرب الناس فعلا لاننا مش بنكون متوقعينه وبيصبح صدمة قوية

يارب يكون هيثم بخير وكل الاصدقاء وان شاء الله يرجع بالسلامة ويمر من اى ازمة والحياة مليئة بالأبتلاءات اللى لازم نتعلم منها


اشكرك غاليتى على اللفته الانسانية منك

دمت بكل خير انت وهيثم وكل الاصدقاء يارب وكل المسلمين فى الدنيا

تسلمى حبيبة قلبى
تحياتى لك

ابراهيم رزق يقول...

رقبة ازازة و قلبى فيها انحشر
شربت كاس و اتنين و خامس عشر
صاحبت ناس من الخمرة ترجع وحوش
و صاحبت ناس من الخمرة ترجع بشر
عجبى ؟؟؟

هى الحياة ابيض و اسود نار و رماد ورد و شوك سعادة و حزن على كل المتناقضات قد ندمع من السعادة بدموع الفرح و قد نضحك من العذاب و الحزن ضحك السخرية و شر البلاء

لكن اقسى ما فى ضربات القريب اننا قد نلتمس له العذر كثيرا و لاننتبه الا بعد ان يكون قد تكسر ما بداخلنا

تحياتى

سواح في ملك الله- يقول...

دنيا
او دونيا جاية من الدنو
وعمر الانسان فيها مهيحس براحة
ولو حس براحة واستقرار ورفاهية
سيصاب بالملل ويدور علي اي
مشاكل تشغله
اصل الانسان جواه طاقة لو ماستنزفهاش
يصاب بالمرض والامراض النفسيه
تحيتي اختنا الفاضلة

Ms Venus يقول...

علشان كدا لازم الحياه تستمر رغم عنا ورغم بوختها وتقل دمها بس لازم تستمر عادى


ايوة يا مارو

جيبتى بالجملة دى كده المفيد

بنتعب ونقع ونبكى ونحزن ونكتئب ونرجع نفرح ونضحك


اصلها هى كده


هتتعاش يعنى هتتعاش

وهنفضل نتفس


ودوام الحال من المحال صح جدااااا

وردة ليكى ولهيثم وبقوله معاكى ربنا يريح باله وقلبه

مصطفى سيف يقول...

ايه كمية الضرب اللي على القفا دي كلها
ده لو فيلم لرشدي اباظة مش هتبقى فيه كمية الضرب دي كلها :)
وفعلا الضربة اللي متقتلش تقويك
والتجارب بتديك قوة اكبر وخبرات اهم
دلازم نتعلم من احداث الحياة ونتعلم منها
بالنسبة لهيثم ربنا يفرج عنه اي غم ويبارك فيه ويرجعه لينا اقوى واقوى
تحياتي

eng_semsem يقول...

احنا بشر وجوانا حاجه اسمها قلب بتحركنا وكتير بيحدد اتجاهتنا وساعات نتوه وساعات نتعب بس في الاخر لازم نجمد عشان نكمل نخسر مره ونقوم نكمل ننكسر ونسند على غيرنا او نفسنا ونحاول برده نحقق امالنا
يارب فرج كرب كل مكروب فينا

فتاه من الصعيد يقول...

كلنا متلخبطين وعمالين نتصدم وناخد على دماغنا اليومين دول مش عارفه لييييه ؟ :)

ربنا معانا يا رب

تحياتي

mrmr يقول...

رغم كل ما يدور بنا من احداث وحروب وزلازل وبراين ووجع قلب لكن برضه ح تستمر الدنيا
لان ده حال الدنيا
ربنا يفك كرب الجميع
عايزه كمان اقولك ان القلب المحب لا يعرف الكره ابدا ومهما حدثت اى مشاجرات او اختلافات فده لا يمكن ابدا يمحى الحب الموجود فى القلوب

ربى يسعدك

مدونة رحلة حياه يقول...

السلام عليكم
عارفة يا مارو احلى حاجة فى كلامك انه فضفضة خرجت كل اللى جواك ولو حبينا نعللق هنخرج كل اللى جوانا بردوا
فى كل الاحوال احنا بشر لينا اخطاء ولينا مزايا ومحدش معصوم من الخطأ بعد انتهاء زمن الانبياء فلازم نتقبل بعض بس مش لازم ندوس على بعض قوى احنا عندنا قلوب بردوا واللى بيتعامل معانا لازم يفهم كدا كويس سواء كان قريب او بعيد
رسالتك وصلت ويارب يتقبل دعائك ودعاء كل من يدعو ومن لا يدعو
دومتى بود

بنت بتحلم يقول...

ده حال الدنيا ........

Haytham Alsayes يقول...

والله يامارو مش عارف اقولك ايه بجد
انتي عارفة انا مش هاقول حاجة بعد اللي قلتيه
شكرا ليكي ولكل الناس بجد
دعواتكم

تحياتي

مصري جدا يقول...

قريب وضربني

بسيطه

شلوت يوديه بوركينا فاسو

وخلاص

hanan khorshid يقول...

كلامك حلو اوى
انا مع لولا وزهراء فى ان لولا الالم كان زماننا منعرفش طعم الفرح
احلى حاجة قلتيها
هى ان الضربة بتوجع حسب مدى القرب

تامر نبيل موسى يقول...

اكيد الحياة تستمر رغم كل شىء

وطول ما احنا عايشين هنشوف من الالم والجراح والغدر ومن الفرح والسعادة والراحة الكثير وتقلب بينهم دائما

فلا شىء يدوم مهما كان

مع خالص تحياتى

Tears يقول...

انا مقتنعه اوى ان اللى يشوف بلوى غيره تهون عليه بلوته بس طبعا الخبرة اللى بنكتسبها بتخفف عنا كتير و بتعمل على وقايتنا مع الزمن

sony2000 يقول...

بجد

عندك حق فكل كلمه قلتيها

الشوكه الناعمه يقول...

بصى يا مارو انا اتعلمت حاجه كل اللى بيحصل لنا حتى لو كان بيوجع فهو خير
كله خير
بس الواحد المهم يستوعب الدرس ويعرف ان ربنا بيربيه وبيعلمه
ربنا بيختار لينا مفروض ما نضيعش وقت واحنا خايفين ولا موجوعين اللى ضربنى على قفايا ضعيف واغبى واجبن من انه يبص فى وشى ويقولى عيوبى او يجرحنى من ادامى
كونى بخير
انتى اقوى من كده
فاكره لما قولتيلى ان الحيه بتستمر
انا بحبك اوى

موناليزا يقول...

عندك حق

momken يقول...

...

مس قادر اقولك كلامك لامسنى اد ايه
وفعلاً حسيت انه بيتكلم عنى

وضحكت اوى لما كنت بقول هى ام كلثوم عرفتنى منين علشان تعرف احساسى بالظبط كده

كنت اود ان اعلق على كل فقره على حده
لان كلكاتك تستحق ذلك بحق
فيها الكثير من الحكمه وفيها ما يقدر بثمن من العبر

ولكن للاسف لا تاتى هذه الكلمات الا فى وقت متأخر بعد ان نخوض فى مستنقع افعال الاخرين

واذا صادق وطالعنا مثل كلماتك قبل ذلك ننظر لها باستخفاف ونقول انها لا تعنينا ولا تخصنا

سيدتى الشجاعه جداً
طالعت كلماتك وانا مشدوة جداً لها
واسجل اعجابى الشديد بحكمتك..وشجاعتك فى الحق
بارك الله لنا فيكى أخت كريمه وسيده عظيمه جداً

تحياتى

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

Timo.. يقول...

عارفة يا مارو..
من غير وجع مش ها نعرف طعم الراحة..
ومن غير ضربات من ناس ما تستحقش تقرب منا.. مش ها نعرف قيمة الناس اللي بعدناهم من غير ما نقصد..!!

عجبني قوي الاهداء في اخر البوست..
قد ايه جميل لما حد يحس بحد بالشكل ده وده اللي بندور عليه وسط كل الضربات والـ(دربكة) اللي بتبقى حوةالينا..

جميلة انت ديما من جواك يا مارو :)

افكار مبعثرة يقول...

بجد كلمات منتهى الصدق
انا اول مرة ازور مدونتك بس مش اخر مرة :) و استمتعت بصدق حرفك و عفويتك
تحياتي ليكي و تقبلي مروري :)