السبت، 8 يناير، 2011

هو كدا .................... اى دمعه حزن لالالالالا وان كان عجبك



هو كده 
بعد كم الاحبطات الشخصيه والعامه اللى بعشها كل يوم
نفسيتى بقت فى الحضيض من فتره 
ويمكن دا ملحوظ جدا ليكم الفتره اللى فاتت
حتى الفرحه والابتسامه
بسرقها سرقه من الزمن
اه برغم قوتها بس طول عمرى بحب اتحدها واطلع لها لسانى
واقولها بعينك انا بردو هاتبسط يا دنيا
حقا وصدقا الفتره اللى فاتت كانت غلبانى اووووووووووى
يجى 18 صفر
النهارده صحيت وانا بقول لاء كفااااااااااااايه
يا دنيا يابنت التتتتتتتتتتتتتتتتتتتتت
وياللى ابوكى تتتتتتتتتتتتتتتتتتتتتتت
ولا مؤخزه امك تتتتتتتتتتتتتتتتتتتتتتتتتتتت

اناجدع ومافيش حاجه هاتعكر مزاجى 
قلبى وجعنى بما فيه الكفايه
كل يوم هرسا اللى جبونا
يوم مشاكل وكبوات
ويوم قنابل وقتلى 
ويوم شهيد مالوش ذنب غير انه مصرى مربى دقنه
وكل يوم فساد
يخربت اللى جابو ابوك

قرار هااااااااااااااااااام

ان شاء الله النهارده مبسوطه
هاسمع كل الاغانى اللى بحبها وهاعمل احلى دماغ واستمتع
بيها 
النهارده اى دمعه حزن لالالالا
اه
هو كده 
ليه؟؟؟؟؟؟؟؟؟؟؟؟؟؟؟
ماعرفش بس هو كده
زهقت يمكن
قرفت يمكن
طهقت يمكن
ويا انا يا هى


وبرغم عدم حبى لعبدو الحليم حافظ
الا انى بعشق اغنيه اى دمعه حزن لا
وقررت اسمعها اول حاجه
وياريت  تسمعهوها معايا

وملعون ابو الدنياااااااااااااااااا 




ملا حوظه مئلوظه


هارد على رددكم اللى فاتت مش هاسبها
وربنا مانا سيبها





هناك 49 تعليقًا:

Mona Abo - Elso3od يقول...

ممكن اجي اقعد معاكي و اسيب البيت
يا رب تقدري تعملي ده و تفرحي بجد
و سمعني احلي اغاني علي الصبح

eng_semsem يقول...

تسلم فكرة كلامك ان نرحم نفسنا شويه من الهم والحزن احنا اخدنا ايه غير تعبنا احنا بس وهسمع معاكي اغاني بس كل واحد ومزاجه بقى
تقبلي تحياتي
يومك سعيد جدا

MR.PRESIDENT يقول...

ازيك غالية ..
اتمني لك سعادة أبدية تدوم
وقولي يارب اللي في بالنا يغور
قادر يا كريم .

وإن شاء الله تفرج وفرجه قريب واللي يقصده لم يخيب .

وعايز أقولك كلمة وإن شاء الله تجاب أمنيتي

- إن الله معنا - إن شاء الله

Ramy يقول...

الأسكندرانية هيغيروا المووود

و أحنا معاااهم (:

الى الأمام يا ريتشاردية

(:

Tears يقول...

كلنا محتاجين كلامك ده لاننا اتهدينا

ياريت نعمل مبادرة فى المدونات نلتزم اسبوع بمواضيع مش حزينة...يعنى اغانى...رومانسية..قصص...اى حاجة غير النكد المصرى

SHAPE YOUR LIFE (ABOALI) يقول...

يااااااااااااصباح التغيرات والتفاؤلات وطبق الفول من عند عم عتريس
واجمد طعمية سخنة وجيلاتى فى عز الشتا
واللى مش عجبه البحر عميق عميق وفيه سحالى

سيبك انتى هما كام لحظة عايشنهم اما نعشهم صح او نكركر اجدع كركرة


تحياتى وكلنا وراك يا ريس

لـــولا وزهـــراء يقول...
أزال المؤلف هذا التعليق.
لـــولا وزهـــراء يقول...

اناجدع ومافيش حاجه هاتعكر مزاجى
قلبى وجعنى بما فيه الكفايه
كل يوم هرسا اللى جبونا
يوم مشاكل وكبوات
ويوم قنابل وقتلى
ويوم شهيد مالوش ذنب غير انه مصرى مربى دقنه
وكل يوم فساد
يخربت اللى جابو ابوك

" انا موش عارفة اطلع لسة من صدمة اول يوم في السنة وامبارح اتصدمت بالمواطن اللي كل ذنبه مربي دقنة..ز بحاول اعمل زيك واطلع لساني... بس هعملها ان شاء الله ... انتي بتعملي دماغك فين عشان انا كمان عايزة اعمل دماغ :d ... سلامي للحاج ريتشارد والبنوتة والامور ربنا يخليهوملك يارب"
لولا

محمد التركى يقول...

السلامو عليكم

الله الله ادينى والنبى شويه من عندكم
لحسن الحاله بقت زيرووووووووووو
وعلى الشمال ياعنى ولا ليه لزمه وبستين جزمه
اه والله انا اللى محتاج قوووى اخرج من الحاله اللى انا فيها
مكنتش متخيل انى ممكن ازعل على حد بعد ابويه الله يرحمه
لكن موت صحبى فوقنى على حاجات كتيييير مكنتش شايفه
او كنت شايفه وبستعبط واعمل روحى اعمه

بجد انا عندى احباط كبير قوى من الدنيا
ومتخيل انى ممكن فى لحظه افارق الحياه
ومش خايف بالعكس
ده اتضحلى انى بشوفه كل يوم ومكنتش واخد بالى
بسافر يوميمن تقريبا فى الشغل على طريق بشوف كميه حوادث بتحصل قدام عينى من كترها مش فاكر عددها
شغلى خطر انى ممكن فى لحظه اضيع برضو
شايل فى جنبى تهمه من المفروض انه بيحمينى لكن الحقيقه انى انا اللى بحميه
لانى لو استخدمته يامسجون ياميت

احبااااااااااط صح
وخنقه
وانتى مش ناقصه
يبقى فكنى منى بقى واخلع بهدوووووووووء
واسيبك مع دماغك العاليه واغانيكى
واروح اكمل احباطى بعييييييد

ولا ايييييييه

المحبط ابن التييييييت
محمـــد التركـــى

صيدلانيه طالعه نازله يقول...

و احب من مكانى هذا اسمع اغنيه
ان مكنتش انت تدلعنى انا حدلع نفسى
ههههههههههههههههههههههههههه
بت يا قطه ما تيجى نروح شقه امى اللى جنبكم و منقولش لحد الشقه فاضيه و امى فى اسوان
انا و انتى و زهرا و الحب الجميل ودودو الرومانسيه
و نقضيها
ههههههههههههههههههههههههههه
و ناخد معانا منى ابو السعود عشان مش تعيط
بس الاكل بقى عليكى اول يوووووووووم
ها ايه رايك
هههههههههههههههههههههههههههه
قولى بسرعه عشان الحق الم هدومى و اطفش

صباح الروقان و الافكار المهيسه

well يقول...

الى العزيزة ريتشارد
تحية طيبة وبعد .. نود ان نعلمكم ان سرقة الابتسامة هى جريمة لا يحاسب عليها القانون .. وبمناسبة لسانك طلعيه براحتك كما فى الصورة الاولى ولكن احذرى الهواء به سم قاتل ( نتج عن القنابل التى اصبحت معتادة فى الافراح)..ورغم هزيمتكم من الدنيا بنتيجة 18 / صفر ..المصرييين بتشجعك واحنا معاهم ..
أما بخصوص الاغانى فنتمنى لكى دماغ عالية ممزوجة بجو اسكندرانى منعش وابسامة مسروقة دون علم الحاكم ..
تحياتى
well

Haytham Alsayes يقول...

احنا نرفع يافطة كبيرة ونقول فيها لا الحزن
تحيا البهججة مع السعادة
عدى ورا ضهرك مفيش حاجة مستهلة
نفتكر ربنا ونهدى كدة وربنا يفرجها علينا جميعا

تحياتي ياريتش

اسراء نايف يقول...

عندك حق من النهرده كفايه كده
اي دمعه حزن لالا
مش هنخليها تغلبنا ولا2صفر حتي
هنحاول نعيش كل لحظه علي انها اخر لحظه:)
مدونتك جميييله اوووووي علي فكره

sony2000 يقول...

صح كدا
وبأويدك وبقوه علي فكره
انا بسمع دلوقتي ناوييييها:))

جايدا العزيزي يقول...

اجدع سلام وتحيه

على الدى جى وكبرى السى

ههههههههههههه

والله انا زيك تمام مجنونه بنت مجنونه

لما تعندنى الدنيا بعاندها

وبهزمها واغلبها

بقولك هو انت برج الحمل ولا ايه

هههههههههه

بس انا بقى بحب حليم اووووووووووى

وبموت فيه كمان

بقولك هى الدنيا ايه غير ايام

لازم نعشها ونهزم حزنها

وحشانى اووووى

يا حببتى

انسى الدنيا ورايح بالك

واوعى تفكر فى اللى جرالك

ايه رائيك انفع

مكبره على الاخر

ربنا يسعدك يا قلبى

تحياتى

Tamer Nabil يقول...

معاكى حق والله

الدنيا ما تستهل

بس نعمل اية قدرنا زى ما بنفرح نحزن ايضا
.
ربنا يبسط ويسعدك دائما


مع خالص تحياتى

فاتيما يقول...

ربنا يروقلك الاحوال يا قطاقيطوووو

بصى انا كتبتها مرة مش فاكرة فين
بس كان تعليق
آه عند آبى
قولتلها احنا ستات وحريم بجد
والحريم بجد
يزعلوا قوى
وبفرحوا قوى
يخلصوا قوى
ويرموا ورا ضهرهم قوى
يحبوا عيالهم قوى
وينسوا الندالة قوى
يعزوا الفرحة قوى
ويعيشوا النكد قوى
احنا كدا
ملناش وسط
مينفعش نبقى مايعين
لازم نعمل كل حاجة بذمة
عشان كدا لما بنتحب بجد محدش بيعرف يستغنى عنا ..ببساطة
عشان مبيعرفش يلاقى الحب القوى وكل حاجة قوى قوى دى

خلاص اتنكدنا قوى
وحزننا قوى
وأى دمعة حزن لا لا لا لا لا يا قطاقيطو
يا قممممممممر

بوسيلى العيال
وسلامى لأبوهم الاخلاق
اللى ربنا كرمه بكنز اسمه
الزوجة الصالحة اللى هيه سيادتك
:)

بوسات
وحضونات
وفعصــــــات

أم هريرة (lolocat) يقول...

السلام عليكم ورحمة الله

هههه والله عندك حق اختى الحبيبة
وعلشان تضحكى من قلبك اقرأى الموضوع ده
انا امبارح كنت هموت من التعب والزهق ولما قرأته مت من الضحك

http://sanahra.blogspot.com/2011/01/2011.html

ربى يزيدك سعادة وسرور

وان شاء الله ربنا يفرج الهم ويزيل الكرب من قلوبنا كلنا

كل التحايا لاجمل قطة

rony يقول...

يا ريييييييييييييييييييت
الكلام جميل وعامل دفعه حلوه للتغيييييير
بس التنفيذ محتاج شوية وقت
اعتقد

ربنا يفرح قلبك ويسعدك دايما
تحياتى

mrmr يقول...

ياريت الكل يقوم من النوم على اول الصبح يقول لنفسه انهارده انا ناوى ابقى سعيد

تصدقى ح تصدقنى ان شاء الله الموضوع ده بينفع قوى واعتقد انه ح ينجح جدا

يارب كل واحد فينا يقدر يرمى الحزن وراء ظهره شويه ويفكر فى السعاده

ياريت بس نقدر

وحشتينى يا قطتى

richardCatheart يقول...

Mona Abo - Elso3od يقول...

ياريت يا منى تيجى وربنا اشهيصك

الحمد لله قدرت وفرحت وامبسطت ولازال الامبساط مستمر بفضل الله

ربنا يفرحك

richardCatheart يقول...

eng_semsem يقول...

صح هو دا نرحم نفسنا يمكن ربنا يرحمنا واساله رب العالمين الرحمه لينا كلنا

مش مهم تسمع ايه المهم تتبسط وتبسط نفسك

وهذا هو المطلوب اثياته

يارب يفرحك

richardCatheart يقول...

MR.PRESIDENT يقول...

ربنا يتقبل دعوك دى ياريسنا ليا

ويتقبلها ليه هو يغور وانت تسعد ونفرح بيك يارب

ان شاء الله معانا ديما ويكرمنا

ربنا يفرحك قلبك

richardCatheart يقول...

Ramy يقول...

اشطاتك ياعم رامى

حلو الكلام يبقى تحاول تطلع من المود دا بقى وتفرفش ياشيخ شويه

دوام الحال محال وبك مغيل الاحوال

رامى هايغير المود واحنا معه

ربنا يفرحك ديما

re7ab.sale7 يقول...

والله انت عسل
أنا برضه بحاول
طيب بقولك إية في مكان فاضي جنبك...؟
اجي يعني ....
ادعيلي بقي عشان مشغولة طحن ومذاكرة وكدة يعني...

richardCatheart يقول...

Tears يقول...

هو دا الكلام الكل تعب والكل عليه ضغط بختلاف المستويات الاجتماعيه

انا معاكى وخلال ايام انشاء الله هانزل بالدعايه للفكره بتاعتك واحاول انشرها

ربنا يسعد قلبك يارب

richardCatheart يقول...

SHAPE YOUR LIFE (ABOALI) ي


هههههههههههه سحالى حلوه وانا قررت اسحل الغم والهم ووجع القلب

وصباح الجيلاتى والفلافل واحلى كلام

ربنا يفرح قلبك

richardCatheart يقول...

لـــولا وزهـــراء يقول...

ماهو طول ماحنا مدلدلين راسنا ليها

هاتفضل كفينا بغمها

يلا خليكى اقوى واجدع منها وطلعلها لسانك بالجامد اوى وغظيها وافرحى واسرقى منها السعاده غصب عن عين ابوها
ههههههههههههه

والله يا لولا دماغى بعملها فى البيت بلم شربات البيت اديها شم هههههههه
لو الشربات قصرت يبقى عليكى وعلى ام التى تى هههههههههههه

ربنا يسعد قلبك

richardCatheart يقول...

محمد التركى


لاء يا تركى مش عايزاك كده لو سمحت ابن بلدى ومنطقتى لازم يبقى سعيد

عايزاك اقوى وجدع زى مانت واكتر

افرح يا تركى لسه بدرى اوى عليك علشان الحزن دا كله

كلنا مش ضمنين نعيش ربع ساعه على بعض

بس بردو لازم نتمتع بالدقيقه الفاضله

ربنا يسعدك ويفرحنى بيك ويكسر حزنك

richardCatheart يقول...

صيدلانيه طالعه نازله يقول...


اشطاتك يا لالا يا حلو انت يا حلو

يلا يابت على الشقه والدماغ عليا وهانضرب خميرا بيرا للصبح وهاجبلكم فسيخ ههههههههههههه خراب يا دنيا خراااااااااب
ههههههههههههههههههههههههههههه
ههههههههههههههههههههههههههههههه

هاتى هدومك ونكلم منى وييييييييييييييلالالالالالالالالالالالالا

ربنا يجعلك بسمه ماتنتهى ويفرحك يارب

richardCatheart يقول...

well يقول...

الغالى ويل يا ويل

وحتى لو بيحاسب ولا هايهمنى انا شاربه بالقرش كله وعليا وعلى اعدائى

هاسرقها هاسرقها وتبسط ان شاء الله هاتبسط

يارب يصلحلك الحال ويفرح قلبك وتفرح

richardCatheart يقول...

Haytham Alsayes يقول...

انا هارفع اليافطه دى يا ابو الهيثم
ان شاء الله وهاعمل حمله كبيره

والله فاكرينه والحمد لله هو كمان فاكرنا

نساله راحه البال ليك ولينا وكل حبايبنا يارب

ربنا يسعدك ديما

richardCatheart يقول...

اسراء نايف يقول...

اهلا بيكى فى عالم الفرحه
ايوا كفايه كده عايزين نفرح عايزين نفرح


انت الاجمل وان شاء فى تواصل على طول

ربنا يسعدك

richardCatheart يقول...

sony2000 يقول...

اشطه يا سونا يا جامد يا ناويها

افرحى وافرحى وافرحى

ربنا يفرح قلبك

richardCatheart يقول...

جايدا العزيزي يقول...

ايوا يا جايدا يا جااااااااااااااامد

وعلى وعلى وعلى وعلى


تنفعى ونص وتلات تربع

وهى عايزه المجانين المطرقعين هما اللى ياكلو عيش فيها
وولعهااااااااااااااااااااااا


ربنا يفرحك ديما

richardCatheart يقول...

Tamer Nabil يقول...


ايوااااااااااااااااا معاك نفرح ونحزن مانخليش الحزن قاطم وسطنا ومعجزنا

الفتره اللى فاتت كل حاجه متعبه من فتره طويل ومافيش حاجه تفرح
خلاص نخلق احنا الفرحه بنفسينا

يارب يتقبل منك يا تامر

ويفرح قلبك

richardCatheart يقول...

القلب لما يدق يقول ايه

تيما تيما تيما تيما

هو دااااااااااااااا

كله بالقوى بالقوى لما جبنا اخرنا اوووووووى يا تيما

الحمد لله على كل حال

وياستى سلامك واصل والعيال بيبوسكى وابوهم بيسلم عليكى

وربنا يسترك زى ما انت رافعه معنوياتى
كلامك كتير عليا

يارب اسأله عز وجل انى اكون زى مابتقولى كده يارب

بحبببببببببببببببببببببببببببك
واحلى بوسات وفعوصات مكلله بدعواتى
من قلبى اللهى يسعدك وتفرح طول عمرك
يارب

بحبك

richardCatheart يقول...

أم هريرة (lolocat) يقول...

ربنا يخليكى ياكاتى انا كل يوم هاحط حاجه تفرحنى اقرها اسمعها اشوفها

المهم مش هاستسلم لحزنى تانى

يارب تفرحى من كل قلبك واشكرك على اللينك الجميل

richardCatheart يقول...

rony يقول...


مافيش وقت احنا الوقت احنا اللى بنعمله قيمه

اقطعى الوقت بالسعاده قبل ما الحزن يقطعك

افرحى ربنا يفرح قلبك

richardCatheart يقول...

mrmr يقول...

انت اللى وحشششششششششششششششششششششششتينى اووووووووووى

ووحشتنى السعاده اللى كنتى بتدخليها قلبى

خدتيها وروحتى فين

ان شاء الله هانقد هانقدر
بس لازم نحاول واحنا مقتنعين

ارجعى بقى ونفضى همك خلى سنانك تبان وانتى بتضحكى زى زمان
ربنا يفرحك ويسعدك يارب

richardCatheart يقول...

re7ab.sale7 يقول...



ايوا حاولى هو دااااااااااااااااا

ياعنى ايه؟؟؟؟؟؟؟؟؟





افرضى مافيش مكان هانفضيلك

السعاده مكان يساعى كل الناس المهم تكونى عايزه
ووانت عايزه يبقى ليكى مكان والكنبه كبببببببببببببببببببببيره

ربنا يسعدك ويسهلك الحال ونسمع كل خير يارب

همسات وبحــ الحياه ــر يقول...

انا جاية اسلم عليكى
وعارفه انى مقصره معاكى كتييير بس هانت اهو كلها ايام
دعواااااتك ياقمرى

Timo.. يقول...

هو ده الكلام :)
وانا كمان مبسوط من التدوينة دي يا قلب القطة وقررت اخد فريدة وننزل نتفسح شوية..
تيجي معانا..؟؟
(';' )

P A S H A يقول...

وربنا ما فيه حاجة مستاهله

روقي وسيبيها على الله

:))

Ms Venus يقول...

ربنا يبعد عنك اى حزن يا مارو


ويارب ايامك كلها تكون سعادة وفرح من غير اى دموع


كلامك جميل وبيدى تفاؤل

فعلا كلنا محتاجين ننفض الحزن من قلوبنا

richardCatheart يقول...

همسات وبحــ الحياه ــر يقول...


والله انت كمان فى بالى مافيش تقصير ولا حاجه انا عارفه اليومين دول زنقه جامده

ربنا معاكى ومعانا ومع الجميع

يارب نسمع اخبار حلوه يارب

وماتحرمش من سؤالك ابداااااااااا

ربنا يسعدك

richardCatheart يقول...

Timo.. يقول...


الحمد لله ان التدوينه فرحتك وادتك دفعه يارب تكنو اتبسطو فى الفسحه دى ياااااااارب

واجى ليه وابقى عزول لالالالا ربنا يهنى تيمو بفريده ويحميكم ويفرحنا بيكم

ربنا يجعل الفرح سكنكم يارب

richardCatheart يقول...

P A S H A يقول...


الله عليك يا باشا انت يا باشا


ايوا انا عملت انتفاضه للحزن ووجع القلب وكله على الله

ربنا يسعدك ويفرحك انت ومرموره يارب

richardCatheart يقول...

Ms Venus يقول...


الله لما القمر يطول تانى ايوا كده اظهر وبان عليك الامان

يارب يافيو يارب ليا وليكى وكل حبايبنا

ولونك لسه بردو

والدليل فين الورد بتاع احلى صاحبه ورد

يارب قلبك يسعد ويفرح وتتملى دنيك به