الأحد، 26 ديسمبر 2010

يام عيون خضرا




بيقولوا عنك يا بهيه
 أم عيون سوده

أنا شايفه عيونك
خضرا وممدوه
على مدد الشوف
خيرك 
سعده ومسعوده

دلتا ونيل مالهم مثيل
يام الهنا بالخير
إديكى مفروده

بحرك تاج الملوك
تاجك على جبينك
زايد جمالك حسن
نضالك آمال مش حزن

وان كان خسيسك عِليِ
مسيره يوم ينجلى
ويبات حزين محصور
خاين ذليل مقهور

وانت ياست الكل واقفه
ومستوره
شالك على كتفك
وإشاربك على القوره

أعزك الرحمن
وذكرك القرآن
أسمك مناره ونور
الدنيا بيه مبهورة

رافعه رايات العزه

يامصر منصوره










هناك 50 تعليقًا:

Ms Venus يقول...

وااااااااااو

الله


ايه الجمال ده يا احلى قطة واجمل ماروووووووووووووو



جميلة اوى اوى اوى يا مارو بجد


كل سنة وانتى بكل خير ياااااااارب انتى واسرتك الجميلة


وسنة سعيدة عليكى وعلينا كلنا يارب


بووسة كبيرة واجمل ورداية لعيونك

Tarkieb يقول...

هههههه وربنا تلاقيك إنت اللي بعين خضرا وعشان كدة عايزة تخلي مصر بعين خضرا...ماشي خضرا خضرا ماهي الايام دي مصر عايزة بجد عدسات...ماهو من كتر الضرب ع الققا نظرها راح.....حلوة ....وعقبال لما بهية ربنا ينصرها كده ...احسنتي...وكل سنة ومصر كلها طيبة وعام سعيد عبد الغني ع الجميع

SHAPE YOUR LIFE (ABOALI) يقول...

الحق التعليق التانى
على ام عيون خضرا
والناس بيقولوا الوان
لكن انا مصمم انى المحبوب ليه مكان
العشق هو بلدى مهما كان وكان
البلد دى وطن كيان انسان
ولا حرف ولا كلمة ولا حروف هجاء
دى قراءن نزل تكريم من السلطان
يااااااااااربى
مهما كان
كفاية ذكرك لها
مرة مرتان تلاتة اربعة كمان
ياااااااااااارب
حقق امالنا
واجعلنا نور هدى لكل بنى الانسان


ولنا عودة

SHAPE YOUR LIFE (ABOALI) يقول...

التعليق الرابع وامرنا لله

عاوز اقول مبسوط انى لسه بلدنا عايشة فينا وبنكتب ليها
نشوفها خضرا نشوفها بمبى نشوفها احمريكا

اللى مش عجبه بلاش يقعد فيها

مشكورة يا انسانه وعودة حميدة واد ايه كلمات بتمس فينا لحن القرب من كيان يجمعنا


تقديرى يا انسانه

Ramy يقول...

(:

حمد الله ع السلااااامة

جميلة جداً الخاطرة دي

تسلم ايدك يا ريتشاردية (:

وانت ياست الكل واقفه ومستوره
شالك على كتفك
وإشاربك على القوره

جامدة دى

MR.PRESIDENT يقول...

كل اللي اقدر اقول كلمات نجم في تلك البهية العزيزة .. القاسية .. اللي مش راضية تبلع الظالم بقوتها .

مصر يااما يا بهية
يام طرحة وجلبية
الزمان شب وانت شبة
هو رايح وانت جية

ولا قولة تميم البرغوثي

قالولى بتحب مصر .. قلت مش عارف
أصل المحبة بسيطة و مصر تركيبة
و مصر حلوة و مرة و شرحة و كئيبة
دانا اختصر منصب الشمس وأقول شمعة
ولا اختصر مصر وانده مصر يا حبيبة

وأكيد مصر هترد وتقولي يا واد يا ريس
" أنا ان قدر الاله مماتى * لا ترى الشرق يرفع الرأس بعدى " بتماسي إبراهيم ناجي

أرد عليها بشعر شوقي :
وطني لو شغلت بالخلد عنه * نازعتني في الخلد نفسي

Haytham Alsayes يقول...

بس هي مش خضرا اوى
هي جاية علي توركواااز
بس ماشي نمشيها خضرا عشان خاطرك انت بس

كل سنة وانتي والحاج طيبين وبخير دايما

لـــولا وزهـــراء يقول...

مـــــــــارو

**************

الصوره الاولى حلوه اوى اوى اوى حاسه كده ان الصحه باينه على وشها وكانها بتاكل من اكلنا وبتشرب من النيل وعشان كده الدمويه هتنط من وشها ههههههههههههه

حلو الكلام وفيه تفاؤل كده بحال مصر بس عندى سؤال اشمعنى لونها اخضر ;) ;)
اوعى يكون المعنى فى بطن الشاعر


على فكره حلو اوى الرجوع ده رجوع قوى ما شاء الله ويارب ام عيون خضرا يبقى وشها عليكى ويكون فى شغل كتير بقى

عارفه يا مارو انا عندى امل ان مصر بكره هيكون حالها افضل من امبارح قولى عليا مجنونه متفائله اى حاجه بس لسه عندى امل يكون لون عيونها احلى عيون

سلامى لكل الناس الحلوه

زهراء

لـــولا وزهـــراء يقول...

مارو القمر... جميلة تلك الكلمات التي خطتها اناملك وتلك العيون التي نظرت بملئ الامل لأمنا مصر.. ايه الجمال ده يارورو تسلم الايادي ياجميلة ... واول مرة اعرف ان مصر بعيون خضرا والمعنى هو وراء ذلك الوصف وتلك الكلمة
لـــولا

جميله المصرى يقول...

السلام عليكم

تسلم ايدك يا قطه ياقمر

بجد والله كلماتك حلوه اووى

ربنا يوفقك يارب

وكل سنه وانتى طيبه

عام سعيد

اختك جميله

nasamat يقول...

جميلة يا بهية ياام عين خضرا وجلابية
هههههههههههه
عجبتنى
وعجبتنى دى
وانت يا ست الكل واقفةومستورة
شالك على كتفك واشاربك ع القورة
اعزك الرحمن وذكرك القران
اسمك منارة ونور الدنيا بيه مبهورة
جميلة قوى

مصر دى حكاية ملهاش حل مهما مر عليها صدق لما قال
الزمن شاب وانتي شابه
هو رايح و انتي جايه
جاية فوق الصعب ماشيه
فات عليكي ليل و ميه
و احتمالك هو ّ هو ّ
و ابتسامتك هيّ هيّ
تضحكي للصبح يصبح
بعد ليله و مغربيه
تطلع الشمس تلاقيكي
معجبانيه و صبيه يا بهيه

بس دى منى ليكى بقى
ردى البيبان يا بهية لا ف يوم يظلموكى
دارى العيون يا صبية لا الناس يحسدوكى
ههههههههههههههه

سواح في ملك الله- يقول...

ماشاء الله
اسلوبك جميل جدا
احييكي عليه
تحياتيالطيبة ليكي
تقبلي مروري

sony2000 يقول...

أييييييييييييييييييييييييييه الحلاوه دي
بجد روووووووووووووووووووووووووووووووووووووووووووووووووووووووووووووووووووووووووووووووووووووووووعه:)

من كل بستان زهرة يقول...

قطتي حبيبتي وحشتييييييييييني
حمد الله على السلامه

ام عيون خضرا متأكده
انا مش شايفه منها غير العين الحمرا
بس برضه بحبها

وكلامك تحفه راائع

وان كان خسيسك عِليِ مسيره يوم ينجلى ويبات حزين محصور خاين ذليل مقهور

كل سنه و بلدنا بخير
والسنه الجديده تبقى كلها سعاده ورخاء
وموت للأعداء
وكل سنة وانتي بخير يا قطقوطه

Mona Abo - Elso3od يقول...

اول مرة هاعلق عندك يا عثل
كلامك حلو اوي و لما سمعته بصوتك كان احلي تسلم ايدك
و يا رب حبنا للبلد دي و احلامنا ليها تتحقق

فاتيما يقول...

قطاقيطوووو

حلوة جداااا
زى ناس كتير فكرتنى الأبيات دى ببهية احمد فؤاد نجم الجميلة
مصر ياما يا بهية
يام طرحة وجلابية

لو سمعك وانتى بتقولى على عيونها خضرا
هتنضروبى يمكن ..


اقولك انا على حاجة بقى
غريبة ومش غريبة

الصورة اللى مع البوست
شبههك قوووووى
اول ما شوفتها
افتكرتك على طوووول
بجد

وحتينى قوى
انتى والعيال وابوهم

خلى بالك منهم
وبوسيلى روحك جاااااامد

والفعصات لا تنتهى
أكيد
يام عيون خضراااا

خواطري مع الحياة يقول...

مساء الجمال على اجمل مارو
كلمات روعة
االله على حب الوطن
عرفتي تعبري عن حبك ليه بكلمات جميلة
ياريت انا اقدراعبر من حبي لمدينتي ماقدرت اكتب عنها
كل مااحاول اكتب لساني يعجز عن وصف محبوبته قلبي يعجز عن قول شي عن محبوبتة التي ساكنه فيه لتكون الكلمات قليله عنها ولا توصف جمالها
ربنا يوفقك وخل مصر اجمل واحلى بلد
تقبلي مروري
سلامي لاجمل وارق مارو.

ستيتة حسب الله الحمش يقول...

حمد الله ع السلامة يا أم اجمل ابتسامة

استني لما احدث فافي عبر الأثير
ألو ألو
هل تسمعني
لأ قطة اجمل من الصورة :)
خلينا نعاكسها كده لما يجي ابو العيال يضربنا

نورتي البلوج يا ريتشاردي
والكلمات بسيطة وتلقائية وخليتني اقول هييييييييييييييييييييييه

على فكرة عيونها تنفع بكل لون
لون الخضرة
ولون البحر :)
ولون عسل النحل كمان
اسمها ايه؟
بهية

الحــب الجميـــل يقول...

تصقيف حاد مع قبلات حارة
جميله جدااااا يا مارو
يااارب يسمع من بوقك ربنا

عزك الرحمن وذكرك القرآن أسمك مناره ونور الدنيا بيه مبهورة
رافعه رايات العزه
يامصر منصوره

دايما يارب

*****

Tears يقول...

يا رب بس تقدر تفضل مستوره لان بيقولوا خد من التل تختل و بصراحة هى بقى شكلها قدام العالم مش حلو و اهلها فضحوها كتير اوى يا قطة لما سيرتها بقت مش زى زمان

.......

معلش اتاخرت فى التعليق لانك مش ح تصدقى ان دى المرة الحداشر احاول ادخل و اعلق من جهازين فضلت احاول بس كل ما المدونة تفتح يا تقفل يا تهنج

........

دمتى بخير

walaa tulip rose يقول...

الله الله الله
ايه الجمال ده
ما شاء الله والله قلتي اللي نفسنا نقوله ونشوفه في ارضنا

كل سنة وانتي بكل خير
وسنه سعيدة يارب
تحياتي

شيرين سامي يقول...

كلمات أكتر من رائعه و أي كلمة في حب مصر بتبقى أجمل
تحياتي ليكي و كل سنه و انت بألف خير

مصري جدا يقول...

نمسك العصايه من النص

هيا اساسا عيونها سودا

بس داهناهم أخضر

اه

فضلت تشرب ملوخيه لحد ما أخضرت

أو لبست عدسات وخلاص

محمد التركى يقول...

يامصر منصوره

ياعنى ياستى مفيش يامصر اسكندريه
أشمعنا منصوره ياعنى علشان عيونهم ملونه
وخدودهم مقلبزه وحمره طبيعى
والكرم زايد عندهم
ههههههههههههههه
ههههههههههههههه

بهرج بهرج معلش
هههههههه

جد بقى شويه
سلام عليكم أختى العزيزه
بنت بلدى ومنطقتى
اللى شكلها كده زعلان منى موووووووت
بس هى عارفه معزتها فى قلبى ماله حدووووود

بوست جميل جدا جدا
مصر تستاهل والله مننا اكتر من اللى احنا بندهولها
تستاهل دمنا علشان تبقى حره
تستاهل عرقنا علشان تكون أقوى
تستاهل نتعلم علشات نعليها اكتر واكتر

والنعمه مصر دى طيبه
تستاهل كل خيييير

المهم سيبك انتى من مصر
انتى عمله ايه
يارب تكونى بخير

كل سنه وانتى طيبه والحج محمد ريتشارد طيب
واولادك ياااااارب
كلكم كلكم طيبييييين
وربنا يجعلها سنه جديده سعيده مليانه حب وخير وسعاده وفرح
عليكى وعلى اسرتك الكريمه وعلى كل حبايبك
وانا من ضمنهم طبعا
عندك اعتراض
هههههههه

سامحينى على قله متبعتى اعزورينى انتى عارفه الظروف والجوابات

ابقى طمنينى عليكى

تقلبى تحياتى
(مرفق مع تحياتى بوكيه ورد بلدى فاخر من الغالى علشان أغلى الناس)

http://www.3bq.com/vb/imgcache2
/1368.gif

محمـــد التركـــى

طالبة مقهورة ..درجة أولى يقول...

أول ما قريت عيون خضرا افتكرتك بتلقحي كلام عليا فقولت أشقر :)

جميلة اوي يا قطتي

اعذريني على تقصيري بس الحالة بايظة اوي

دعواتك ...

re7ab.sale7 يقول...

والله من اول ما قرأت وانا قلت اكيد المنصورة
اية ده مفيش حاجة طيب لبلطيم...؟
ده حتي بيقولوا ان احلي عيون عيون بنات بلطيم ....

Sharm يقول...

حلوة اوي

فتاه من الصعيد يقول...

يا متعدده المواهب :)

جميله أوي الكلمات

ربنا يخليلنا بهيه .... ويخلينا أبناء افضل

تحياتي

أم هريرة (lolocat) يقول...

السلام عليكم ورحمة الله
جميل ان ارى هنا شىء من الالفة
اقصد بالطبع القطط هههه

كلمتك جميلة جدا راقت لى
لكن سؤال كل الدنيا بتقول ان مصر عيونها اما سودا اوعسلية انت بقى خلتيها حضرا
تعرفى انا فهمت انك تقصدى طبعا الخير والخضار والنماء
جميل المعنى جدا حبيبتى بارك الله فيك

(على فكرة انا رديت على سؤالك فى قطتى )
تحياتى لك

richardCatheart يقول...

Ms Venus

الحمد لله انها عجبتك يا فيوانت الاحلى والله

ويارب سنه سعيده عليكى وعلى اهلك واحبابك يارب ويجعله عيد سعيد ان شاء الله

تسلمى يا احلى صاحبه ورد

richardCatheart يقول...

Tarkieb يقول...

هههههههههه اه بتمحك فى بهيه اشمعنى السمر ولادها وام عيون سوده مبسوطه قولت اغير بقى ههههههههههههه

والله يا تيكو انت من اكتر الناس اللى قابلتهم نفسهم الخير للبلد دى مش تبقى احسن لاء تبقى زى ماكانت

معلش ادينى ركبت العدسات ليها وربنا يسهل يمكن تشوف ربنا يعينها ويسمع منك
وينصرها يارب

اشكرك يا ابو التيك وعام سعيد صالح علينا وعليك يا فنان البلوجر

richardCatheart يقول...

SHAPE YOUR LIFE (ABOALI)

للانسان صاحب الكلام اللى بميزان
دهب موزن كلامك يرن يسمع الكون

تحياتى يا ابو على على حب بهيه

ام عيون خضرا وطرحه وجلابيه

تسلم ياانسان

richardCatheart يقول...

SHAPE YOUR LIFE (ABOALI)


طبعا لسه عايشه وهاتفضل عايشه واحنا هانموت وهى باقيه هى الارض الرحم الام

اللى مش عجبه كده كده مابيجبش سيرتها ومابيقولش انها امه واصله فاسيبك منهم

انما اللى بيتكلم عنها حتى لو بنقض فهو
بردو بيحبها

يارب ديما بالخير يا انسان
واشكرك لسؤالك عنى كتر الف خيرك

richardCatheart يقول...

Ramy يقول...

تسلم يا ابو الرام ماتحرمش منك

فكرنى الجزء دا بامى وامك علشان كده انا كمان حباه

ربنا يهديلك الحال ويطمنا عليك
ويارب سنه سعيده عليك وعلى كل الاهل والاحباب

richardCatheart يقول...

MR.PRESIDENT


الله عليك يا ريس

مافيش بعد نجم وكلامه عن بهيه البهيه

تسلم ويسلم اختيارك

richardCatheart يقول...

Haytham Alsayes


والنبى يا ابو الهيثم خضرا بلون الزرع

بس دقق كده هاتلاقيها كلللللللها خير

تسلم يا غالى الا قولى انت قافل المحل ليه

هو انا اجى انت تخلع ارجع بقى عايزين شويه تاريخ مشكل كده نمخمخ بيهم ونعمر الجمجمه

يارب سنه سعيده عليك وعلى الاهل والاحباب وانت بخير وصحه

richardCatheart يقول...

لـــولا وزهـــراء يقول...

ايوا يا بطه ماهى دى الفلاحه بتاعت زمان ام الخير مش الكاوى والرش اللى اكلنا دلوقتى


ابدا والله لا فطنه ولا زوره ههههههههه

الخضرا نماء وخير وهى ام الخير كله
لاء مش هاقول مجنونه

هاقول عندك عشم فى وجه الله ودا اجمل مافى الدنيا خليكى كده زيى وربنا يصلح الحال يارب

كل سنه وانت طيبه وبخير وكل اهلك وحبايبك بصحه يارب

richardCatheart يقول...

لـــولا وزهـــراء يقول...


ربنا يخليكى يا لولا اتبسطت انها عجبتك والله

وصف بهيه مايخلصش وكل واحد هايحاول يكتب فيها هايكتب سنين ومش هايمل

تسلمى يا لولا وكل سنه وانت والاهل والاحباب بالف خير ويارب سنه احلى من اللى فاتت

richardCatheart يقول...

جميله المصرى يقول...

اشكرك يا جميله اوى والحمد لله انها عجبتك

وانت طيبه وبالف خير وصحه ويارب سنه سعيده عليكى وعلى كل حابيبك يارب

richardCatheart يقول...

nasamat يقول...


ايه الجمال يا نوسه هههههههههههه

مافيش بعد اللى اتقال يا متقال ههههههههههه

بردو دا من اكتر الابيات اللى حبتها وانا بكتبها

وحاضر هاسمع الكلام يا غاليه
كل سنه وانت احلى واحسن وكل حبايبك بخير يا يا ننوسه حياتى

richardCatheart يقول...

سواح في ملك الله- يقول...


اشكرك على كلامك الطيب
والحمد لله انها عجبتك دى حاجه تسعدنى

اشكرك لمرورك فى تزاصل مستمر ان شاء الله
عام سعيد عليك ان شاء الله

richardCatheart يقول...

sony2000 يقول...

انت الاحلى يا سوسو ماتحرمش منك يارب
سنه سعيده يارب عليكى

richardCatheart يقول...

من كل بستان زهرة يقول...

فلورا الجميله الناعمه القويه اللى كلها حنيه انت وحشتينى اكتر ربنا يخليكى يارب

لازم ساعات تحمر بس ربنا مايديم حمرها ويكتر خضارها يارب

مبسوطه انها عجبتك والله
وربنا يتقبل دعائك يارب

كل سنه وانت طيبه وفى اسعد حال ان شاء الله

richardCatheart يقول...

Mona Abo - Elso3od يقول...

منمونه السكر ماتحرمش منك بس لعملوماتك الصوت فى التليفون خمك يا جميل هههههههههه

ربنا يخليكى ويتقبل منك دعائك
ويارب سنه سعيده عليكى وعلى عائلتك كلها

richardCatheart يقول...

فاتيما يقول...


تيما انا زعلانه من نفسى جدا
من ساعه ماقريت تعليقك دا لانى كنت لسه فى عندى شويه زعل منك ومن ساعه ماقريت كلامك اللى مفعوله مفعول الكلور مطهر ومنظف للبقع والاوساخ والجراثيم وانا زعلانه لانى من الناس اللى لازم تقدر اووووووى دا لانى متاكده انك من جواكى انسانه غير
ارجدوكى تقبلى اعتذارى واسفى انى زعلت منك ولو حبه لانى مش قادره اسامح نفسى


الصوره مريهان بردو قالتلى فيها منك ياماما هههههههه

واضح انك انت وصحبتك متفقين

ومافيش بعد اختيارك لكلام نجم يا تيما

انت كمان وحشتينى اوووووووووووووى
ودا اللى زعلنى والله كان نفسى اشوفك يا ام قلب بفته بيضاء
ربنا يهديلك الحال يارب ويطمنا عليكى
وياريت تسمحينى وتقوليلى سامحتك يابت يا مارو

سلام مخصوص من الحاج وبوسات من حبايبك منه وميرو
وحضن بفعصه تترقع الضهر منى
يارب سنه سعيده وكلها هنا عليكى وعلى ماما وماجب وحبيب الروح يوسف

فاتيما يقول...

يا قطاقيطووووو

الكلام اللى قولتيه دا مكنلوش أى لزوم
انا اللى كنت مكسوفة من نفسى لأنى عارفة انى كان المفروض آجى يوم البؤجة
بس غصب عنى والله
انا حكيت لدودو وممكن تبقى تقولك الاسباب ايه لأنى مش هعرف اقولها هنا
بس ان شاء الله اقرب لقاء ف اسكندرية هتلاقينى عندكم ومرمية ف حضنك الجميل دا

انا مش مسامحاكى عشان مش زعلانة اصلااا
وسامحينى انتى لو لسه فيه
فتفوتة زعل جواكى منى ...
والله على عينى


و لو انا قلبى بفتا بيضا ؟
يبقى قلبــ♥ـــك انتى
توب حرير دمشقى
عشان بيقولوا ان افخر
انواع الحرير جاى من سوريا
ويكون لونه ابيض برضو



وايوه الصورة شبههك قوى
انتى احلى طبعاااا زى ما ستوتة قالت
بس الملامح فيها كتير منك
:)


لا تنازل عن البوسات
والحضونات
والفعصات
مهما حصل

وحقك عليا

عمرو يسرى يقول...

عارف انى متاخر اوى اوى اوى بس عشان كنت بصقف
كلمات جميله جدا جدا

وانت ياست الكل واقفه ومستوره شالك على كتفك وإشاربك على القوره
أعزك الرحمن وذكرك القرآن أسمك مناره ونور الدنيا بيه مبهورة

ايه الجمال ده

P A S H A يقول...

يا نهاااااااااااااااااااار أبيض

ده كلامك بجد ؟؟

روعة والله العظيم

تسلم الأيادي يا ريتشارد


كل سنة وانتي طيبة وبألف خير وصحة وسعادة وسلامة انتي والأسرة الكريمة فرداً فرداً وإن شاء الله عام جديد سعيد عليكي تحققي فيه كل ما تتمنين .. عظيم سلامي واحترامي لأخويا الكبير / الحاج ريتشارد وانتيمي سمو الأدميرال / ميرو

سلام

norahaty يقول...

كلماتك جميلة
ياقلب القطة
بس بلدنا أتغيرت
وأتغيرت اوووى كمان
ربنا يستر علينا وعليها

toomy يقول...

طبعا البوست جمييييييييييييييييييييل جدا جدا جدا
كل سنة وانتي طيبه بمناسبة السنة الجديدة
تعالي عندي ع المدونه ليكي هديه انتي والحب الجميل :)
كل سنه وانتي طيبه يا احلي مارو
:)