الخميس، 16 سبتمبر 2010

جأنا التاج التاتى ............. تاج المحبه اتخرم 2




جأنا التاج التاتى

كنت وعدت الغاليه دموع القمر انى اول ما ارجع 
ان شاء الله هارد على التاج بتعها بشكرها جددددددددى
 انها افتكرتنى وقتها به
ولانى بحب الحب وبموت فى الحب فا مانستش التاج وهاجاوب
كادردشه  ولو حد حب انه يكتبلنا اجابته يشرفنى  والله
السؤال الاول
:
رتب الاتى حسب اهميتها بالنسبه لك
الصداقه _ الحب _ العائله_ المستقبل _ المال

الصداقه - الحب - العائله - المستقبل - المال


السؤال التانى
:
اجب عما يلى
:


1-عرف الحب فى جمله صغيره ( حب الحبيب و الحبيبه )

 الحب زى المشرط يا يداوى يا يقتل

 الحب مخدر ماتحسش بلعنته غير وهو بينسحب من الجسم

2 -وهل يمكن ان نعيش بدون حب (الحبيبه او الحبيب برده ) ؟؟؟  

انا عن نفسى لاء طبعا استحاله  عايشه حاله حبى على طول

3-ا الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش؟


 وحياه الغالى وغلاوه الشمندوره  بحبك
  

-4ياترى إيه أكتر حاجة بتكرهها فى الحياة ؟؟؟



الخيانه بكل اشكلها وانوعها ومسمايتها
اللغوصه فى اعراض الناس 
دول عندى يقتلونى



-5
لو هتتمنى أمنية قبل ما تموت هتبق إ
يه
غير ان ربنا يسامحنى ويغفر لى ويتقبلنى

ارجع اعيش  اسبوع كده ولا حاجه فى الاربعنيات ياعنى من اوال الاربعنيات وارجع قبل الثوره ماتقوم بيومين بس

-6مين أكتر حد محتاج تشوفه وترتاح فى حضنه أو تبص فى عنيه

والله انا فى حاله اشتياق ديما لابويا واتمنى ان دا يحصل 
بالرغم ان امى ربنا يدها الصحه ويخليهالى ماليا عليا حياتى حنان بس  ديما فى اشتياق ليه 


-7مين أكتر حد نفسك تخسره؟

انا ماينفعش يبقى فى حد فى حياتى ونفس الوقت  مش عايزه فيها

اللى مش عايزه فيها هو  مش فيها طول ماالشخص فى اطار حياتى فا انا مش عايزه اخسره


-8من وجهة نظرك ... إيه هى الحياة ؟؟؟

بالرغم من حبى الفظيع للحياه ومتع الحياه  الا انها بردو  مجرد رحله بنتسلى فيها بالمر والحلو بالغلط والتوبه لغاااااااااااااااااااااااايه مانقابل وجه رب كريم


-9ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟

لو سابنى غصب عنه  مات مثلا بعد الشر طبعا مستحيييييييييييييل

لو سابنى بمزاجه وخلع والكلام بتاع اصلى اكتشفت انى مابحبكيش 
وانت مش تيبى وشغل اذ فجأتن دا
يبقى احب واحب واحب من هنا للسنه الجايه وانا مرتاحه الضمير

 
-10 ياترى تقول إيه للعالم كله ؟؟

صحيح اللى اختشو ماتو من زمان وتحللو

-11 ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟

 طبعا لاء انا مقتنعه ان  الدنيا مابتديش كل حاجه علشان كده انا اضحى بحلمى  مقابل اللى حوليا اللى هما اكيد اهم منى ومن حلمى  ان شالله يكون حلمى عبد الباقى 



12
ياترى إيه أكتر إحساس عشته الايام اللى فاتت 

شويه اكتئاب على مقسم كده لسه بينسحبو من الجته

بتمررى التاج دا لمين ......

والله ياريت يرضو بس وليهم كامل الحريه فى قبوله  او رفضه
ستيته حسب الله الحمش ست الستات

فاتيما ام يوسف

لانى متأكده انهم هايمتعونى بأجابتهم


هناك 46 تعليقًا:

SHAPE YOUR LIFE (ABOALI) يقول...

الحق يا اختى اوووووووووووول تعليق

الله اكبر
تم تحرير التراب التدوينى

لنااااااااااا عودة

SHAPE YOUR LIFE (ABOALI) يقول...

تعرفى يا قطة

اعشق واحب الناس اللى فاهمة حياه
وانتى ماشاء الله ربنا حباكى بتلك النعمة

على قدر ما حملت الاجابات البسمات
الا انها اضاءت بحقائق احيانا نهرب منها
او نقترب

فعلا
الناس مثل المشرط
فيه ناس تشرط قلبك وتدخل اعماقه وانت مبتسم
وفيه ناس تشرط قلبك وتقول يارب صبرنى
وفيه ناس تتغلل بالمشرط وتقول بنهزر ونضحك وانت بتتألم

وما الدنيا الا قلب قطة مشرط


تقديرى وخاااااااالص الاحترام

Ramy يقول...

يا سيدى يا سيدى

ريتشارديه تتألق فى

تاج المحبة أتخرم و تجيب جووووووون

بجد يا ريتشاردية دى أجاباتك بجد

أنا مصدقها من أول يوم جيت فيه المدونة و هو ده

تسلم ايدك و دماغك

ربنا يخليلك الوالدة

و الحاج و سلملنا عليه كتيييير السلام امانه

و يخليلك اولادك و يطلعوا زيك كدة يارب

ربنا يحفظكوا

(:

Ramy يقول...

سمعنا و السمع خير

أن فيه لقاء أسكندرانى قريب

والونا بالتفاصيل الله يكرمكم (:

richardCatheart يقول...

SHAPE YOUR LIFE (ABOALI)

مبروك الاحتلال ولاونك نسيت تقولها
احتتتتتتتتتتتتتتتتلال هههههههههه

ربنا كرمك اخر كرم علشان لسه طالعمن رمضان ماتتعودش على كده فى محتل ينسى يقول احتلالالالالالالالالالالالالال دى كلمه التثبيت هههههههههههههههههه

richardCatheart يقول...

SHAPE YOUR LIFE (ABOALI

والله كلامك دا كتير عليا اوووووووووووووى كتر الف خيرك رائى يشرفنى من فيلسوف زيك
ليه نظرته ورؤيته الخاصه بعمق

تحيه وتقدر لانسان

richardCatheart يقول...

Ramy

اه وربنا اجباتى تشوف البطاقه هههههههه

ربنا يخليك يا رامى انت اللى تسلم

ويسلم ذوقك ومخك الجميل

الكل هنا بيسلم عليك جدى والحج باعتلك مليون تحيه
ربنا يفرحنا بيك يارب

richardCatheart يقول...

Ramy

ايوان ان شاء الله اللقاء عن قريب وانا عارفه انك عارف ومالكش حجه تقدر تعمل حسابك من دلوقتى هايكون يو السبت باذن الله 2\9 وكلنا هانعمل تدوينات للاعلان عنه علشان الكل يعرف وهانوافيكم بالاخبار كلها فى التدوينات دى ان شاء الله

مساك فل

Ramy يقول...

مفهمتنيش

انا عارف طبعا دى أجاباتك

انا قصدى بجد عارف انها اجباتك

انا عارف علشان دة اللى حسيته من الكلام معاكى و مع الحج (:

منغير بطايق(:

richardCatheart يقول...

هههههههههههههههههههههههههههه

ايوا بس حبيت ااكدلك بس
ههههههههههههههههههههههههههههه

mrmr يقول...

اجابتك فى الجون يا قطتى
ربنا يديم عليك الحب
ويديم عليكى حنان الام ويباركلك فى ماما

محمود(باحث عن حب) يقول...

موفقه
ان
شاء
الله
يارب
يعزك

Tears يقول...

ايه حكاية القطط اللى منتشرة فى المدونات دى....ده احنا خلاص قربنا نونووووووو :))

اسئلة التاج حلوة اوى و مبتكرة و اجوبتك دخلت القلب لانها خرجت من القلب و فيها صدق


ربنا يديم عليكي الحب

Haytham Alsayes يقول...

هههههههههههههههههههههه
ينهار ابيض ياجدعان
انتي طلعتي قلب قطة بجد
يعني ساعات يخربش وساعات يبقي طيب
والصور حكاية الصراحة والنيو لوك بتاع البحر جامد

وحلو تاج المحبة اتخرم
فكرني بكوز المحبة اتخرم بتاع ليشع وسمعان
لو كنتي متابعة ربع مشكل
هههههههههههههههههههههههههه

بجد اجابات ممتعة ومقنعة وشافية وصافية
تحياتي
ياجدع اسكندرانية

الحب الجميل يقول...

ميه ميه
الله ينور عليكى
ربنا يخليلك ماما يارب
قريتى النكت ؟؟؟
هههههههههه
أمشى

لـــولا وزهـــراء يقول...

مــــــارو

اين كنتى ؟؟؟

كل ده غياب ....

المهم نورتى من تانى حمد لله على السلامه

شدنى اوى جملة اللغوصه فى اعراض الناس لان بجد بقيت هوايه عن بعض بنى البشر انهم يتكلموا عن ده ويجيبوا فى سيرة دى وربنا يحفظنا ويكفينا شرهم ...

ربنا يبارك لك فى والدتك ويحفظها لك

ويرحم والدك ووالدى وكل اموات المسلمين ....

الف سلامه من الاكتئاب كده برضه ماحدش يقول كنت جيت طبت عليكى واكلت كنافه بالمانجو اوعى تقولى رمضان خلص ...

على فكره اجابتك مش غريبه لان هى دى مارو بنت البلد الجدعه اللى لما تشوفها تحس انك تعرفها من زمان

انتى عارفه انى مش منافقه ومش مجامله وان اللى فى قلبى على لسانى

ربنا يبارك لك ويحفظ لكى محمد والولاد
سلام لهم كلهم

سنه دراسيه سعيده كلها هنا وفرح ونجااااااااااااااااااااح يارب


زهراء

ستيتة حسب الله الحمش يقول...

علي النعمة عثل وثكر وشربات مكرر
تعرفي يا ريتشاردي
لولا البحر والناس اللي منه
كانت الناس بتوع مصر دول ماتوا كمدا
ياختي كده مكبرين نفوخنا وبنحب الحياة وريحنا خفيف
ما شاء الله خمسة وخميسة في عين كل حد دمه يلطش
انا بكره التاجات جدا
انتي اهديتي لي واحد وقبله رامي اهدى لي واحد
ولأنكما غالين قوي
ها اجاوب لما اقدر ان شاء الله

بحبك

جوجو يقول...

السلام عليكم
ياااااة انتى لسة فاكرة تحليه ده فايت عالينا بقاله شهر طلع عينى لحد ما حليته
المهم اجاباتك واقعية وعجبتنى جدا
تحياتى

richardCatheart يقول...

mrmr

احساسى بكلمك جون دى انك اهلاويه ههههههههه

ربنا يخليكى يا مرمر دا من ذوقك بس ربنا يخليلك كل حبايبك ويسعدك ديما

richardCatheart يقول...

محمود(باحث عن حب)

شكرا يا محمود على مرورك الكريم

اكرمك الله

richardCatheart يقول...

محمود(باحث عن حب)

هههههههههههه انا عارفه يا اختى والله خايفه نانونو فعلا ولا يجو يلمونا ويودونا الحجر الصحى ههههههههههه ربنا يستر


شكرا على كلامك الجميل زيك اعتقد ان فعلا الصدق بيوصل لكل صادق

richardCatheart يقول...

Haytham Alsayes

هههههههه ايوا يا اخى ما انا قطه بس متدربه وبكتب على الكى لورد هههههههه

كلنا كده يا ابو الهيثم فينا الطيبه اوقات فينا الخير اوقات الفرق فى اللى بيكتر خيره على شره

يارب بس المدونه تشتغل عند كل الناس علشان مااطرش اغيرها ابجى تعالى بلبط عندنا

طبعا كنت متابعه كيلو مشكل معلش اصل ربع مايكفيش كانو شربات الصراحه
شكرا يا ابو الهيثم على كلامك

richardCatheart يقول...

الحب الجميل يقول...

ميه ميه عليك انت يا جميل يا بتاع النكت اسيح بقى ولا بلاش هههههههههههههه


ربنا يخليكى ياحب ماتحرمش منك ابدا

richardCatheart يقول...

لـــولا وزهـــراء


والله يابطوط من ساعه مادخلت ابيض الاوده

للولاد لغايه رمضان ماخلص وانا كنت حاسه انى بحلم ماكنش فى اى قدره اعمل اى حاجه كنت بحاول فى رمضان ادخل هنا او السايت بس ايه بطلوع الروح والله
ودا اللى جابلى الاكتائب تغير النظام الحياتى مره وحده بيدربكنى خصوصا لو فيه شغل كتير الحمد لله عدى وفات وبلح امهات

ربنا يكرمك يارب ويتقبل منك ان شاء الله يارب
وكتر خيرك على كلامك يا بطوط عارفه طبعا انت اللى فى قلبك على لسانك
ربنا يخليلك ماما وكل حبايبك سلامى ليهم كلهم

richardCatheart يقول...

ستيتة حسب الله الحمش

ههههههههههههههههه دا انا بردو بالزمه دا كلام مصنع العثل والنحله الام بتتكلم اخرااااااااااااابى

بعد الشر على مصر واهل مصر يفرقعو واحنا موجودين يا نفرقع كلنا مع بعتشينا يا بلاش

والله ياستى مافى احلى من تكبير الدماغ والتهويه نعمه واللى يكرها يعمى
ساعات بنتنشق عليها وبتبقى ولا الحشيش مافيش فتفوته فى الاسواق

والله بشكرك اوى اوى اوى جدى بس والله انت اى كلمه هاتكتبيها
هاتفدنا وتمتعنا صدقينى والله واى تاج هايكون منك مختلف شكرا على كرمك

richardCatheart يقول...

هههههههههههههه انا وعدت وبادمت وعدت يبقى لازم ولا بد اوفى وبعدى مهما طال الوقت احمدى ربنا وبوسى ايدك شعر ودقن

دى دموع القمر جاوبت عليه بعد خمس شهور يا اعنى انا اجدع شهر يادوب حلو

الحمد لله يا جوجو ان الاجابات اقنعتك دى حاجه تفرحنى جدى

MR.PRESIDENT يقول...

بعد السلام والتحيه
أما بعد
من رئيس الجمهورية

بأمانه أكثر اجابه ضربت في نافوخي بتاع الثورة - لأن التاج عاطفي شوية وانا طبعا مليش في العواطف - لكن اجابتك رسمت علي وشي ابتسامه استغراب وتعجب واعجاب بالاجابة .

ربنا يجعل الله قرة أعيننا ، ودينه سبيلنا ، ويوفق كل الناس ليكون بنهم موده ورحمه

همس الاحباب يقول...

ربنا يديم عليكم محبته وتيجانكم كمااااااااان
الاجابات تلقائية وصادقة ومصحوبة بخفة دم وبساطة السهل الممتنع
الحب زى المشرط يا يداوى يا يقتل

الحب مخدر ماتحسش بلعنته غير وهو بينسحب من الجسم
عجبتنى الاجابة دى قوى قوى
برغم من قلة كلماتها الا ان معناها كبير جدا جدا
تحياتى

اقصوصه يقول...

مبروك التاج

حلوه الاجابات :)

فشكووول يقول...

ازيك يا ريتش
كيف حالك
احنا رجعنا تانى للتاجات
والسلطانيه
الحمد لله .. مش بحبها خالص
تحياتى

من كل بستان زهرة يقول...

أيه ياقطقوطه الأجابات الجامده دي
ياعيني عليك ياواد يا حبيب انت ياجامد

ومبروك على النيولوك للمدونه
ياعيني على أزرقاتك

فتاه من الصعيد يقول...

إنتي عثل على فكره :)

بجد اجاباتك جميله :)

تحياتي

الشـــــوكه النــاعمه يقول...

هى دى مصر .........يوووووووو
قصدى القطه
وربنا كنت متوقعه اللى هاتقوليه اصلك بقيتى علامه مسجله
واحشانى يا مامتى

richardCatheart يقول...

MR.PRESIDENT

ازيك يارياسه طبعا لازم الاجابه تاعت الثوره تعجبت ماهى لو ماكانتش قامت
ماكنتش انت زمانك تاعب نفسك فى الرياسه والدوشه دى الله يعينك

والله حاجه تسعدنى انى قدرت اضيف بسمه على وشك دى عندى كفايه

richardCatheart يقول...

همس الاحباب يقول...

خالد الجدع ربنا يكرمك يارب ويجعلك الحب فى كل مكان

هههههههههه شكلك كده مجرب الانسحاب قبل كده واتبهدلت

richardCatheart يقول...

اقصوصه يقول...

تسلميلى يارب

انت الاحلى

richardCatheart يقول...

فشكووول

فشكول باشا والله منورنى كان نفسى اسبق انا بالزياره بس انت اكرم والله

والله ولا انا بحب التيجان السلاطين ممكن فيها شوربه ههههههههههههه

بس التاج دا عجبنى مش اكتر

ان شاء الله التواصل بنا مستمر

richardCatheart يقول...

من كل بستان زهرة

ازيك يا فلورا انه يا اختى حبيب من زمان لما دوبت ههههههههههههه

شكرا على كلامك الحلو الناعم زيك

الله يبارك فيكى الحمد لله انها عجبتك

ابقى تعالى بلبطى عندنا

richardCatheart يقول...

فتاه من الصعيد

والله انت الاعثل يا شيخه

انا مبسوطه علشان هاترجعى تنزلى قصصك اللى مفتقضها اوى

richardCatheart يقول...

الشـــــوكه النــاعمه

ههههههههههههههه دا على اساس ان مصر هى امك يابت هههههههههههههه

طبعا ما انا كتاب مفتوح يا ماما ليكى انت وصلتى لصفحه كام

يارب ديما بخير يا شكشوكتى ومن احسن لاحسن

ELMOSTAFZ يقول...

ازيك يا ريتشاررررد ، صباح الخير ، عاملة ايه ، أيه الأخبار ، ازي الصحة ، ايه أخبار الأولاد مع الدراسة ؟ مكتئبين ؟ يبقوا مش طبيعيين لو كانوا فرحانين :)
مبروك عليكي التاج التاني و عقبال ما تقفليهم دستة :)

من كل بستان زهرة يقول...

قطقوطه انا قضيت العيد في إسكندريه

كان نفسي أشوفك يا جميله

يلا ان شاء الله المره الجايه

همسات وبحــ الحياه ــر يقول...

انا جيت ياقطتى
ربنا يخليكى ليا
بس انت خلتينى دموع الحب :):) ولا دا اسم حد تانى هههههههه
اجاباتك جميلة

richardCatheart يقول...

ELMOSTAFZ


ازيك انت يا مستا لاء طبعا اكتائب ليهم ولا مهم هايستمر او شهر على الاقل

هههههههههه يا دوب

richardCatheart يقول...

من كل بستان زهرة

ياريت كنتى قولتى كنا اتقابلنا

طيب ماتحاولى تيجى التجمع اللى هايتعمل قريب ان شاء الله تنورى الدنيا والله

richardCatheart يقول...

همسات وبحــ الحياه ــر يقول

اه الاول الاسم دخل فى بعضه بس ظبطه بعد كده دموع القمر انا اقدر يا قمر بردو


بس ايه الغبطه دى دا انت اهو باسم تالت

همسات مين فين

انت منورانى وبشكرك انك فكرانى والله

الحمد لله ان الاجابات ععجبتك