الاثنين، 31 مايو، 2010

صايع بحر




احلى تحيه واحلى سلام لكل حبيبنا اللى شرفونا
يوم من اجمل الايام اللى عشتها فى بلدى اسكندريه
انضم لايام الذكريات الحلوه اللى ماتتنساش ابدااااا

قابلت ناس صحيح اول مره اشوفها وجه لوجه بس فعلا كانى
عشت معاهم كتير واعرفهم من زمان فى ناس حتى مدخلتش عندهم قبل كده وماكنتش اعرف مدونتهم بس ان شاء الله التواصل  معاهم هايبتدى ويستمر  والله قابلت ناس فى منتهى الجمال والذوق والجدعنه ودا مش غريب لانهم متعودين يتلمو فى خير ديما

فى بدايه اليوم وصلت انا والحج ريشارد والولاد بدرى عن معياد وصولهم بنص ساعه كلمت خالد همس الاحباب الجدع قالى احنا وصلنا عند مكتبه اسكندريه وجاين بصراحه انا محرومه فسح وخروج فاقولت استغل الموقف واتصور بقى على الحب حبيبى 
اللى ماكنتش شوفته من مده بسبب الدراسه والوقت
وصلت شله ناس من بعيد قولت للحج  الجماعه اهم وفعلا خالد رفع الموبايل يتصل بيا وهو بيبصلنا من بعيد شاكك فينا ههههههه
ورحنا سلمنا كانو الموجدين 
خالد همس الاحباب الجدع
فاتيما تيما حبيبه قلبى ام يوسف
الانسه اللاموره انجى
شريف باشا انسان مهذب زى ردوده قليل الكلام بس خفيف الظل
وابتسمته طيبه وجميله
مصطفى ريان اللى بيتكسف جدا مهذب وطيب ودمه شربات
وكاتب مميز زى ماعرفت
احمد بيه هادى جدا ماتكلمش تقريبا كتير بس فعلا ذوق وسمح الوجه وبردو بيتكسف 

ضياء بيوتيفل مايند انسان جميل ومثقف وغاوى غزو ثقافى
بيشتركو كلهم فى صفه واحده انهم ودودين جدا فعلا

السلام الاول كان عادى واول ماتيما عرفت انى قلب القطه وانا عرفت انها تيما نطينا فى حضن بعض وهاتك يابوس وتفعيص بالاحضان زى ماوعدنا بعض كانى عارفها من زمان والله 
اموره وحبوبه ومع الوقت عرفت انها تستاهل كل حب الناس ربنا يديمه عليها يارب
كلنا فرحنا جدا بالقاء وهما فرحو بالولاد جدا بصراحه ودا اسعدنى ولاول مره ابقى ماشيه فى الشارع مش قلقانه على الولاد لان الكل كان عنيهم عليهم وبيراعوهم ومهتمين بيهم جدا
مش بقولكم ناس جدعه اووووى



قررنا ندخل القلعه نلبسها وكان القرار التاريخى وفعلا دخلنا 
وابتدى ابتدى ابتدى المشوار ودخلنا سراديب القلعه وغرفها
وكلنا فى تعليقات ساخره فى محاوله فاشله منى بأقناع الحج ريتشارد بجمال الاثار والطوب الحجر وهو يقولى جمال ايه دا شبه بيت ستى الكبير الله يرحمها وكل تركيزه ان لو القلعه دى تتهد ويطلع بدلها مساكن للشباب او حتى يأجروهالم زى ماهى 
يكون احسن اهو نستفيد منها بدل وقفتها فى الشمس من غير 
 لازمه 


وطبعا كان فى معانه فى طلو السلالم ومعانه اكبر فى نزلها السلمه ماشاء الله ست ادوار وكان سؤلنا ياترى الناس كانت رجلها طول ايه علشا يطلعوها واللى يقول اصل الاسمنت كان ببلاش اللى يقول ماكنش فى احمد عز هههههههههه 
اهو ماقولتش اسامى ماهنتوش عليا بردو
اتصورنا صور كتير كلها جميله بس هاكتفى بصور القلعه بعد مالبست لان دا سبق صوحافى 


وبعد مانزلنا ابتدت ناس حلوه تانيه تيجى 
دودو نبضات قلب ولهان  جدعه وسكره اوووووى ربنا يسعد قلبها
حنين القلب ام عمرو جميله وبردو جدعه جدا وميرو ابنها الجميل ربنا يخليه لها ويفرحها به  ماشاء الله عليه قمر انن كده يتاكل
انا موت فيه هو تعب معانا بس اكيد اتبسط زينا
 حنان القمر ربنا يقومها بالسلامه وتجبلنا رودينا عروسه عمر بخير يارب طيبه وسمحه بجد


مى رحيق الورد اللى فاجاتنى بهدوئها وانها حبوبه جدا وبقت صاحبه مريهان هى وانجى جدا ربنا يفرحنى بيهم يارب
واسماء نبض اسكندريه السكره هاديه بردو جدا بس حبوبه ودمها خفيف
وداليا ماى كورنر فى منتهى الذوق والود وزعلت منها انها ماجبتش الولاد معها ربنا يخلوهملها وتفرح بيهم ست سكره
الناس دى جات بعد مالفينا القلعه  وكانو عايزين يلفو تانى بس للاسف الوقت ماكانش معنا اقنعناهم انها شويه حجاره وعيب على الاسكندرنيه يقولو اننا ماشوفنهاش هههههههههه المهم اقتنعو


وقررنا نطلع نتمشى لحد الزعيم وهنا اتفرقنا اجزاء 
جزء اختفى احمد ومصطفى وانجى وشريف باعونا ورحو ياكلو
ههههههههههه واحنا طلعنا على الزعيم وهناك كانت القعده الحلوه احتلينا المطعم وهاتك ياكلام  وضحك وتهيص وشربنا
مشروبات وضربنا السندويتشات اللى كنت عاملها الحمد لله 
انهم استحملوها  وبعد حبه مصطفى ريان ظهر وقعد معانا


وحصلتى احلى مفاجاه وانا بتكلم مع خالد انى كان نفسى ستيته ست الستات تيجى واشوفها كان رد فعله غريب وفرحنى اوى
وهو بيقولى  انت فيكى كتير منها كلامها وشكلها وطريقتها 
بصراحه اتبسط اوىىىىىىىىىىىى لانها من الناس اللى ليهم معازه خاصه عندى جدا وطبعا كعاده خالد الجدع عمل حركه اجمل ماتكون واتصل بيها يسلم عليها وكان ليا الشرف انى اسمع صوتها الجميل زى كتابتها والصوت الحلو وخفه الدم اللى سمعتها هى اللى تطلع الكتابت دى فعلا
وانا بقولها خالد بيقول عليا فيا منك ضحكت وقالتلى مش انت اسكندرنيه وانا بورسعديه ياعنى سلملى على البحر المتوسط
جمييييييله ماشاء الله عليها ربنا يطمنها على عفرتو وعلى امورتنا والثانويه العامه يارب ويفرح قلبها وان شاء الله القا قريب
ياست الستات ويكن لى الشرف والله

وحظى الحلو خالانى اسمع صوت ندى الياسمين السكره بنت المنصوره اجدع ناس وهى وعدتنى ان زيارتنا هاتكون فيها برمات اهو بدبسك ياندى هههههههههه كان لى الشرف انى سمعت صوتك والله



وكانت المفاجاه اللى كنت ماعرفهاش وهى احتفالهم بعيد ميلاد فاتيما كان نفسى يقوللى علشان اجبلها تذكار تفتكرنى به
اتعملنا قعده جميله بره فى الهواء الطلق وانضملنا ناس حلوه تانيه

نانو القدر وانا ست فاضله كريمه واموره وبنوتتها الاموره  اللى عيبها الوحيد انها زمالكاويه
بس هى عثوله مش مهم بقى انها زمالكاويه انا حبتها وخلاص
واشرف الامور الانن اللى ميرو حبه جدا ولعب معه

وحنان الشافعى البنوته الاموره ام عيون دباحه حتت بنت سكره
ربنا يفرحنى بيها
وظهر شريف باشا واحمد بس ضيا كان لسه فى حاله غزو ثقافى فى المكتبه 
واحتفلنا بعيد الميلاد وسط الغنى والفرحه وفاتيما مبسوطه وكسوفه بس هى تستاهل   بجد والله كل خير ربنا يفرحنا برجوع يوسف ليها ويفرحنا بيها يارب 



وحبه بعد الكلام والضحك والهزار والكلام الطيب انضملنا

وليد الدوغرى شاب جميل والله زى كل اللى كانو معانا انا استجدعته جدا خفيف الدم وابن بلد وبيفهم ولسانه طويل زيى هههههههه اتكلمنا مع بعض واتشرفت به هو من الناس اللى ماكنتش اعرفها ولا بدخل عندها بس خلاص بقينا اخوات
وعلى طول هاتواصل معه ان شاء الله

وانضملنا احمد بدراوى اللذيذ وهبه خميس العثوله اللى بجد نورونا وسعدت بيهم اوى

وقررنا نضرب بنطه  او بولطه فى البحر حسب ماكل واحد بيقولها لان اختلف فيها التقاويل ههههههه
ووصلنا لحد الريس المركبى واتفقنا معه وهنا انضمتلنا  العشره الحلوه 
زهراء او بطه زى ما انا متعاوده اقولها اتبسط جدا انى شوفتها
بقلنا سنه وست شهور نفسنا نتقابل واخيرا اتقبلنا زى ماكانت ولازالت سكره يابطتى هههههههههه ربنا يفرحنا بيكى يارب 
ويسعد قلبك



لكن للاسف بطه ومى وحنان عندهم دوار البحر فاقررو يستنونا
وهنا ظهرت شهامه ولاد البلد الجدعان وليد اتنازل عن الفسحه البحريه علشان مايسبش اخواته البنات لوحدهم فى الشارع
واستنى معاهم  يا مشرفنى يا وليد

طلعنا كلنا المركب ولفينا ساعه فى البحر مع الغنى والتصقيف والزغاريت والصور وكانت من اجمل الساعات فى اليوم بجد







خلصنا المركب واتجمعنا بره تانى كلنا وقررنا نرجع الزعيم ناكل بقى ونرتاح وفعلا روحنا اتغدينا كلنا  وطبعا كلام وحورات
مع وليد وبطه تموت من الضحك كلنا اتبسطنا جدا الحمد لله
وقررنا نطلعو على المرسى ابو العباس  علشان الناس تصلى
ونرحو المراجيح  وطبعا العيال عيالى كانو عاشمنين فى المراجيح اوى بس 
هنا بقى الحج قال يلا والحج امر وامر ياجميل مرك ماشى 
كتر الف خيره الراجل  خلانى اقضى يوم من اجمل ايام حياتى
وسلمت على الناس الموجوده بس للاسف مش كلهم لان فى ناس كانت راحت تصلى وناس بتشترى حاجات
فادى فرصتى اسلم عليهم واقولهم انتم كلكم من احسن الناس اللى عرفتهم بجد ومن غير مجاملات والله 
الناس اللى ماسلمتش عليهم
شريف باشا انت بجد طيب ومحترم وبشكرك جدا على تعبك معيا ومع ميرو والاسكوتر ويارب افرح بيك
خالد همس الاحباب الجدع ربنا يباركلك فى همس وشابى ومامتهم
وينوركلك حياتك
حنين القلب ياجدعه ربنا يباركلك فى عمر وتشوفيه عريس
اكيد هانتقابل قريب ان شاء الله
حنان ام رودينا ربنا يطمنى عليكى
اسماء نبض اسكندريه ربنا يفرحنى بيكى يارب
ولكل الناس اللى كانو معانا ولحقت اسلم عليهم ليكم كل حبى وحب عائلتى الصغيره
هى كبرت بيكم كلكم والله
الناس اللى كان نفسى اشوفها
ستيته ست الستات
علا لالا صيدالانيه 
بنت خيخه نوران
ندى الياسمين
اللقا نصيب ويارب يكون ليا نصيب اشوفكم
واتقابل معاكم يكون ليا الشرف

البحر بيسلم عليكم كلللللللللللللللللللللللللللللللللكم







هناك 39 تعليقًا:

همس الاحباب يقول...

اجدع سلام صعيدى شحط محط لاجدع ناس اسكندرانية

Tears يقول...

جميل اوى اسلوبك يا قلب القطة بس مش كنتى تقوليلنا انتى اى واحدة فى الصور...اللى بكم ازرق و لا اسود :))))

عموما أهم حاجة انك اتبسطى و اتفسحتى و ربنا يديم عليكى السعادة و الدفء دايما

همس الاحباب يقول...

هههههه علشان اول تعليق ناخد راحتنا بقى قبل الغزو التترى ما يوصل هنا
امممم
نشرب شاى وناخد فرصتنا يا جدعان

من كل بستان زهرة يقول...

قطقوطه
يابختك روحتى أسكندريه
كنت خديني معاكي.... البحر واحشني أوي
يلا المره الجايه ان شاء الله
بس انا عايزه أسألك سؤال

نانو القدر وانا وبنوتتها الاموره اللى عيبها الوحيد انها زمالكاويه بس هى عثوله مش مهم بقى انها زمالكاويه

مالهم الزمالكويه يا قطتي
هاااااااا مالهم
خلي بالك أنا زمالكويه متعصبه
عموما أختلاف التشجيع لايفسد للود قضيه

يارب يسعدك طول العمر

همس الاحباب يقول...

الزباين وصلت يبقى نقصر ونلم المتكسر
احسن يفسحونا على طريقة ريا وسكينة
بادى ذى بدء ( يا عينى عليا ) احب اشكر حضرتك والاستاذ محمد والاولاد انكم شرفتونا ونورتونا وخليتو اليوم ليه طعم تانى بوجودكم
ثانيا بشكركم على جدعنتكم وكرمكم وحسن الضيافة اللى قابلتونا بيها
ثالثا : شكرا على سندوتشات الفراخ الجميلة
رابعا : انتم اسرة بسم الله ماشاء الله اخلاق وادب وعلم وثقافة وخفى دم متناهية ونمسك الماوس للمرة التانية ههههه
خامسا :شكرا على كلماتك الرقيقة فى حق الجميع وشكرا للمرة المليون على تعبكم معانا واهتمامكم الاكثر من رائع
تحياتى وتقديرى

حنين القلب يقول...

هييييييييييييييه انا جيت
نورت البيت طبعا
والله وحشتينننننننننى اوى يا مارو وانبسطت اوى معاكم والله واحلى ما فى اليوم اللانش والبحر والزعيم والمراجيححححححح كانت تحفه
بجد سعدت جدا انى اتعرفت عليكى
انسانه هايله ودمك عسل والله واحلى ما فيكى انك على طبيعتك وحسيت انى اعرفك من زمان طبعا مش بنت منطقتشى
وبسم الله ما شاء الله اولادك بجد ادب واخلاق وتربيه ودم خفيف ربنا يبارك ليكى فيهم وتشوفيهم احلى الناس
ربنا يجمعنا دايما على خير

ام عمر

الحب الجميل يقول...

مش كنتى قلتى نقابلكم فى اسكندريه كنت حابه اتعرف على الصحبه الحلوه دى

تقبلي مرورى ياقلب القطه ودوام التواصل ويسعدنى زيارتك فى مدونتى

كل السعاده والفرح

هي وظروفها يقول...

باشا

صباح الفل يا كبير

بدايه احب اوجه تحيه وسلامات كبيره
لاخت مكنتش اعرفها
بس بجد ومش انا بس
كل مدوني القاهره حسوا انك اخت ونعرفك من زمان
الله يخرب بيت فقرك
بتسيحيلي اني سافل
ماشي

طب خليها بيني وبينك

وبعدين بقي بخصوص ستيته هانم
وانك فعلا شبهها

ستيته بقي دي غاليه الغالييين

ولما تشوفيها هتلاقي نفسك تعرفيها من زمان
اكنها جارتك اللي جمبك
اختك بنت ابوكب وامك
حاجه كده من الزمن النضيف

بخصوص حنان وعيونها الدباحه
فنا عاكستها ميت مره
ومش هقولك ان عنيها شارمينج ولا حاجه
لانها اجمل من الشارمينج بمراحل
ضحكنا ضحك في ركوب المراجيح
وافتكرت دكان شحاته
شكلنا نسينا نجيب التروازر
سلملنا علي ريتشارد قلب الاسد

والمره الجايه باذن الله نشوفكم علي خير
ونتكلم اكتر
ربنا يهدي سرك معاه يا مارو ويبارك في ولادك
وفي بيتك وف حياتك
وتملي نشوفكم علي خير
سلامو عليكو

الشـوكة الــنـاعـمـة يقول...

ازيك؟ يارب تكونى بخير
ربنا يفرح قلبك والفسحه الجميله دى تتكرر تانى
ربنا يديم بينكم المحبه
تحياتى

Haytham Alsayes يقول...

يسلااااااااااااااام

اسكندرية ...طيب انتي دلوقتي خبطي في دماغي بوست عن اسكندرية ان شاء الله عاكتبه قريب

انتي عارفة انا احسن بلد بحبها فعلا اسكندرية كليتي كانت فيها وذكراتي الحلوة فيها وكمان بحضر الماجستير فيها
وكان عندى فرصة ان احضر في دمنهور بس تقولي ايه بأة غتاتة
هههههههههههه
اكيد الرحلة كانت جميلة وقريت تفاصيل الرحلة كمان عند فاتيما

تحياتي ياجدع اسكندرانية

زهــــراء يقول...

مارووووووووووو
-*-*-*-*-*-*

يقال ان اللقاء نصيب وبميعاد وكل مكتوب عند ربنا واكيد هو اللى كتب لنا نلتقى ونتقابل فى اليوم وفى الساعه المحدده

مهما قولت لك ان اليوم ده مش محسوب من عمرى لان شوفت ناس اغلى من الماس وكان نفسى اكون من اول اليوم معاكم بس طبعا انتى عارفه الظروف ورغم التوتر اللى كنت فيه اول اليوم لكن عن جد كنت فرحانه اوى اوى اوى بوجودى معاكم
منه بنتك حتة سكره ربنا يحفظها لك وتشوفيها عروسه كبيره
ميرو حبيب قلبى ربنا يبارك لك فيه ويحقق لكى كل احلامك فيه
محمد زوجك طول عمره اخ عزيز من فتره وبالفعل كان نفسى اتكلم معاه كتير بس هو كان مستعجل وانا جيت متاخره
ربنا يحفظ لكى اسرتك ويفرح قلبك بهم ويبعد عنك شر الحسد ياااااااااارب

شكر خاص انك رديتى على الغير معرفه عند وليد لانها جابت سيرتى وكان نفسى ارد بس احترمت كلامك وقولت خلاص مش هارد ............

يا مارو احنا مش عشرة يوم او اتنين وياما شوفنا مع بعض ضحك وهزار وعرفنا عن بعض كل حاجه والعشره مش تهون على اى حد وانا عارفه انك بنت بلد وجدعه وتشرفت بمقابلتك والكلام معاكى
ملحوظه

اوعى تفتكرى وليد قعد معنا عشان خايف علينا نووووووووووووو هو قال الصراحه فى البوست بتاعه بس الصراحه وليد ده شهم اوى اوى اوى ومن الناس الجميله اللى كسبتها فى التدوين

ان شاء الله تتكرر اللقاءات
ربنا يدوم الحب والموده الى اخر العمر

سلام مربع الى محمد ومنه وميرووو

فاتيما يقول...

كدا يا قطاقيطو ؟؟

نسيت اجيب سيرة سنكوتشاتك دى ؟؟
و القطط كمان اللى كلت م التورتة على ايدك
و القطط اللى جرينا وراهم انا و مروان و قدنا نعاكس فيهم

كمان مقولتش على حكاية الشبه الجميل بينك و بين ستوتة

معلش الزهايمر
و دى فايدة ان حد يكتب تانى عن اللقاءات عشان يبقى فيه تكامل بين المراسلين و كتر خيرك انتى و وليد انا قولت محدش بيكتب ليه يكونش اليوم كان وحش و انا مش واخدة بالى ؟؟؟؟


انتى مش محتاجة اقولك
احساسى ناحيتك ايه؟
انا جاية فرحانة انى هشوفك و ماشية فرحانة انى شوفتك و ان بقى ليا اخت اسكندرانية جدعة تنضم لعقد اللوليات اللى ربنا كرمنى بيهم خصوصا ف اسكنكرية الماريا ...
و انا خلاص هقنع محمد فوزى و نعمل عملية كومانذوز و اخطف يوسف و اجى استوطن حداكم و اللى ييجى ناحيتنى ابعتهولكوا يتقطع بقى

ميرهان وحشتنى تصورى؟؟
ما شاء الله عليها زى السكر
و حنينة و مهذبة و حاجة تفرح
و لا مروان الطعامة
الواد سابنى اقعد ابوس فيه و اسرح ف شعره و لا اشتكى و لا فتح بوقه
عسل بجد انا حسيته شبه يوسف قوى
بس يوسف لبط شوية مش هادى كدا
ربنا يحرسهم كلهم
و المرة الجاية يقعدوا يلعبوا سوا و معاهم شرفنطح افندى ابن نانو القدر و انا و عمر و و لاد داليا و كل العيال الحلوة


الحاج ريتشارد شخصية محترمة و دمه خفيف و ربنا يحرسكم و يخليكم لبعض يا رب

هنستناكم ف الكاهرة بقى
و ان شاء الله تنوروها و نقعدكم ف الحسين زى ما طلبتى
لأ طلبتى إيه؟؟
انتى تؤمرى و احنا ننفذ

ربنا يسعد كل ايامك
زى ما اسعدتونا اليوم دا و اكتر
و مكنت اعرف ان التفعيصة الملازمة للحضونة هتبقى حلوة كدا لدرجة انها توحشنى ى ى ى
آهو و الله
تصورى؟!!

بوسات و حضوناااااااااات
يا قطقوطتى ى ى ى
بوسيلة ميرهان و مروان
و الحاج ريتشارد الأخلاص

فاتيما يقول...

آه
نسيت اقول حاجة مهمة

ان الصور ..يا قمرررر
حلوة قووووى
تسلميلنا

richardCatheart يقول...

همس الاحباب

اول تعليق ياابو خالد وانزل بالضوء الشارد

richardCatheart يقول...

Tears

انت الاحلى يا تيرز وكلك ذوق انا ياستى لا اسود ولا ازرق انا كنت بصور هههههه

ربنا يخليكى ويفرح قلبك انت كمان
ويتقبل الدعا ليكى وليا يارب

نورتينى اوى ياتيرز واتمنى المره الجايه تكونى معانا

richardCatheart يقول...

همس الاحباب

ههههههههههههههه شاى ايه ياريس دا بيتك قول غدا تصدق بالله انا من يومها مافيش مكان فى معدتى لغايه دلوقتى
خد طبق الملوخيه دا ههههههه

richardCatheart يقول...

من كل بستان زهرة

لالا يافلور انا ماروحتش هما اللى جم نوارونى والله ونور اسكندريه انا بقى اسكندرانيه مقيمه منذ الميلاد ههههههه

بصى كان المفروض اعلن عندى هنا كمان
علشان اللى مايعرفش يعرف والكل يجى
بس كنت لسه منزله البوست الاخير وماعرفتش اعمل ايه فاعتمدت على الدعايه اللى عند خالد همس الاحباب وحنين القلب وقلب ولهان بس ملحوقه وان شاء تتعوض وتجى تنورينا يااحلى فلورا

انا اتكلمت الزولكاويه حبايبنا واجدع ناس بادمنا بنغلبهم هههههههه
تحياتى ياجدع زملكاويه

richardCatheart يقول...

همس الاحباب

هههههههه زابين ايه ياخى انت صاحب محل
وبعدين انت بتدينى اكتر من حقى بجد واى حاجه اتعملت دا اقل من الواجب قمتكم عندنا اكبر من كدا بكتير ربنا اعلم
غير كدا محمد حبكم جدااااااااا ودا نادر انه يحصل لانه مش اجتماعى غير الولاد طبعا
اتشعلقو بيكم وكل يوم سؤال عن حد فيكم
ربنا يديم المعروف ياخالد احنا الاول اخوات فى الله وبعدين يجمعنا التدوين والكلمه الطيبه
يارب ديما منورنى

richardCatheart يقول...

حنين القلب
هههههه بيت ايه يابت يام عمر داحنا ولاد منطقه واحده نورتى الدنيا كلها
انت وعموره حبيبى والنى بوسهولى بس براحه
مع عضه خفيفه من الخد الايسر

والله وانت وحشتينى ودودو وحنان ربنا يخليكم لبعض يارب ويديم عليكم نعمه الصداقه والحب
وانا اتبسطت اكتر ومبسوطه انى اتعرفت عليكى لانك جدعه بجد وانا بحب الناس الجدعه
الاصيله
ويارب تفرحى بنجاحات عمر وشهادته وفرحه يارب
وسلام من الولاد والحاج ريتشاد ليكى
ويارب ديما فى الخير ويديم المعروف ياحنين

richardCatheart يقول...

الحب الجميل
والله انا قصرت فعلا فى الاعلان عندى وكان نفسى اكبر عدد يعرف علشان كل الحبايب تيجى والله

وسعيده جدا بزيارتك الاولى ليا يارب ديما منورانى وان شاء الله التواصل مستمر
ليا الشرف

نورتينى

richardCatheart يقول...

هي وظروفها

وليد بيك والله انا اللى اسعد بمعرفتك
اخ جدع وابن بلد ويعلم الله انه نفس احساسى بيكم كلكم

والله ابدا مابسجلش انا قولت بردو كده
دانت والل ادب واخلاق اما اللسان الطويل دا طبع اللى زينا هنعمل ايه هانقصه مثلا ربنا يحميك محترم واخلاق ومصلى
ويارب يهدى سرك ونفرح بيك ان شاء الله

اما ستيته بقى طبيعى ان كل الناس تحبها دا مش غريب عنها
وحنان القمر ربنا يحميها انا عارفه انك بتعاكسها هزار مش اكتر
انت اكتر حد تخاف عليهم ياجدع فيه ايه
هههههههههههه
ربنا يخليك على الكلمتين الحلوين دول
والحاج ريتشارد بيسلم عليك جدا
والمره الجايه ليكم قاعده حلوه مع بعض
تهيسو فيها احلى تهيس
ربنا يديم المعروف يا وليد وانا كاسبت اخ عزيز
نورت الدنيا

richardCatheart يقول...

الشـوكة الــنـاعـمـة

ازيك ياشكشوكتى وحشانى انا عارفه انى انشغلت عنك اليومين دول بس قولت فرصه تهدى كده وانا حاسه بادمتى رديتى عندى يبقى بقيتى احسن شويه يارب يهدى سرك ويهديلك الحال يارب ياشوكه انت عارفه انى مهما قاست عليكى بحبك ازاى
وانا هافضى ونتكلم كتير واطمن عليكى
كان اليوم ناقصك بس ان شاء الله تتعوض
نورتى ياشكشوكه

enjy يقول...

انا جيت انا جيت انا جيييييييييييت

بوسة الاول وحضن كبير اوى اوى انتى وحشتينى كتيييييييير ومريهان وحشتنى اوى اوى وميرو صديقى وحشنى

انا انبسطت جدا جدا بيكم والله وميرو مش رايح من دماغى كان نفسى استلفه منك يومين وللا حاجة كنا هنعمل احلى شغل مع بعض

وللا مريهان والعسل والادب والعينين اللى كلها براءة وطيبة وذكاء

انا حبيتكم بجد والله وانبسطت جدا اوى خالص..بس فاتك عربية الفول يا قطة والله كانت تجنن فعلا..كانت اول مرة اعمل كدة وانبسطت اوى

بقالى كتييييييييير مخرجتش خروجة حلوة اوى كدة..كنت حاسة انى اعرفكوا من زمان من اول ما شفتك عند القلعة وكنت بتكلم فى التليفون وانتى عملتى لى باى باى وانا قلتلك ثوانى اخلص تليفون واجى اسلم وابوس واحضن واعمل كل حاجة..كنت مبسوطة اوى بيكوا واتمنى نتقابل تانى كتير كتييييييييير


اما بالنسبة لرأى الحاج ريتشارد فى القلعة فقولى له هنعديهالك عشان حضرتك انسان طيب اوى ومحترم ومش مهم قول اللى انت عايزة يا فندم هنتحملك

الصور تحفففففففففففة جدا جدا جدا خصوصا الصورة بتاعة القلعة من قريب اللى بالجنب دى جامدة جدا..بغض النظر عن الصور الشخصية اللى كان واضح فيها معجزاتك يا قمرررررر

ربنا يعزكوا ويبارك فيكوا يارب ويارب اشوفكوا تانى على خير

richardCatheart يقول...

Haytham Alsayes

هههههههههه دا هيثم لما يجى يكتب عن اسكندريه يابقى هاسمع درر ياريت تكتب عن عشقى الاول اسكندريه بوست محترم من بتوعك كده بس كتر الصور اصلها جميله وصوره جميله ههههه

بجد ياعنى انت خريج جامعه اسكندريه والله لينا الشرف يا هيثم والله وليه غتاته دانت تنورها وزدها نور ياخى

وفى انتظار البوست الجامد ياجدع رجل تاريخ

richardCatheart يقول...

زهــــراء

بطه الجميل انا اسعد والله وانت عارفه
وفعلا كله بمعاد واوان والحمد لله انه كان يوم جميل اوى وكان نفسنا كلنا تكونى من بدرى معانا والله بس معلش تتعوض ان شاء الله ويارب نسمع اخبار حلوه قريب عن النتيجه يارب

والله محمد باعتلك سلام جامد جدا وكان نفسه يقعد معاكى بس كان معانا ورح الكتب وبعدين رجع على البيت علشان الورق وجه يخدنا كان خلاص خلص ياعينى
ربنا يقويه بس ان شاء الله نتقابل عن قريب ومنه وميرو باعتلك بوسه كبيره
والله يابطه ماحد هايضحك وهايتبسط زى ايمنا كلنا مع بعض بس اهو سبحان من له الملك والدوام وادينا لسه بردو مع بعض ربنا يديم المعروف والمحبه يارب
وافرح بيكى عن قريب وافقعلك الزغروته المحترمه

ايه يابنتى هاتضربى سمعة الجدع فى السوق ليه هههههههههههه لالالا انا متاكده انه فضل معاكم علشان خايف عليكم

ومين دى اللى تجيب سيرتك قطع لسانها لالالا
سيبك منها ترقعه بنات

واجدع تحيه وسلام لاحلى بطه فى الجمهوريه والوطن العربى

well يقول...

وصل السلام يا بحر
ان شاء الله تتقابلوا فى الجنة واحنا معاكوا

تحياتى

richardCatheart يقول...

فاتيما

هههههههههه والله انت فى ردك دا فاكرتينى بحاجات بردو كنت ناسياها هههههههههه
بس اللى فاكره كويس انى قابلت انسانه جميله من بره ومن جوه والله وكسبت اخت غاليه اوى ياريت ياختى تيجى انت وسى حمو فوزى وانا مستعده اشترك معاكم فى عمليه خطف يوسف وتعيشو هنا وتخلفونا هدى سلطان
وعبد الوهاب ونعيش فى مغنى وطرب اؤدام البحر ههههههههههههه

الولاد بيسالو عليكى ومنه مصممه تدخل المدونه عندك تكتبلك تحيه وانا وعدتها ان شاء الله ميرو عايز يروح معاكى النزهه علشان تتفرجو على الحيوانات ههههههههه
يارب نتجمع تانى والولاد يلعبو ويعرفو بعض ونقضى يوم جيل طيب يارب
انت كمان هاتوحشينى وهاتوحشينا كلنا
ومحمد باعتلك مليون سلام والله كتتتتتتتتير اوى
ربنا يطمن قلبك يارب ويسعدك بالحبيبن

وعلى فكره ان شاء الله هابعتلك كل الصور فى ميلات وتقدرى تبعتيها كل حابيبنا اللى كانو معانا ان شاء الله

بوساتى اممممممممممممممممممممو
وتعيصاتىىىىىىىىىىىىىىىىىىىىىىىىىى

mostafa rayan يقول...

انا بجد انبسطت قوي بالقاء ده وانى اتعرفت عليكي وعلى اسرتك الجميلة وبجد انا حسيت انكم عائلتى وانى عارفكم من زمان مش اول مرة نتقابل
انا روحت اسكندرية كتير لكن بجد المرة دي كان لها طعم مختلف طعم احلى واجمل بكتير
ان شاء الله يكون في زيارت تانية ونقضي وقت احلى
وطبعا مش هنتكلم عن الجدعنة والفرحة اللي قابلوتنا بيها
ربنا يسعد ايامكو ويديم الفرحة عليكم

richardCatheart يقول...

enjy


جوجو الجميل انت سكر والله وانت كمان وحشتينا جداااااااا حاسه بفرق من ساعه ماعرفتكم بجد والله
وبعدين ماقولتيش ليه موضوع انك عايزة تستلفى مروان دا واحنا مع بعض كنت هادهولك وعليع ازازه بيبسى فاضيه هديه
واللى يرجع فى كلامه يبقى عيل هههههههههه
اهو تاخديلك يومين زن وانا اريح شويه

ومريهان والله حبتك جدا واتعلقت بيكى
انت ومى وبتتكلم عليكى كتير

طيب انا مارديتش اسيح واقول عربيه فول علشان البرستيج الجامعى وبتاع
يلا ماشى اديكى انت قولتى هههههههه
بس بردو ندتلى وماجتيش سيره كنا جينا غمسنا معاكم ههههههه المهم انك اتبسطى واننا عرفناكى يا جوجو ومعرفه الخير والله
الحج باعتلك السلام اوى وان شاء الله هانتقابل عن قريب
والحمد لله ان الصور عجبتك ولسه هابعتلك صورنا الشخصيه تتفرجى وتتمزجى كده وتفتكرى وتضحكى
يارب اسمع اخبار النجاح قريب وافرح بيكى ياجوجو يارب ربنا يهنيكى ويسعدك
يابونته ياسكره
ديما فى تواصل ان شاء الله

richardCatheart يقول...

well

ويل يا ويل

ازيك ياويل والله كان نفسى تكون وينا ونتعرف عليك

يارب يتقبل منك يارب يجعل جمعنا فى الجنه
يارب وانت معانا ياصاحب الدعوه الحلوه

ربنا يخليك ياويل

richardCatheart يقول...

mostafa rayan

اهلا اهلا يا مصطفى مبسوطه اوى بردك عندى
واحنا كنا اسعد والله بمعرفتك ياكريم الاخلاق
وحصلنا الشرف والله
احنا كمان عايشين فى اسكندريه وبنخرج فيها على طول بس دا يوم من الايام القليه المحسوبه فى عمرنا انت انسان جميل
بجد ويارب اشوفك كاتب كبير واشاور واقول مصطفى ريان دا صاحبنا هههههههههههههه
انت تستاهل كل خير والله
والحج باعتلك السلام كتير يا مصطفى
وان شاء الله تتكرر تانى ويكون يوم طيب
ربنا يخليك على كلامك الحلو ويارب يفرحنى بيك
نورت الدنيا

ELMOSTAFZ يقول...

مع اني معرفش الناس بتتأقلم ازاي مع بعض في اي لقاء اجتماعي ، بس ربنا يديم المحبة اللي بينكوا دي نادرا ما بشوفها...
لكي تحياتي و أكثر...

ستيتة حسب الله الحمش يقول...

غيظوني غيظوني يا اشرار
لكم كلكم يوم من اوله تقعدوا مع مذاكرة العيال وانا اللي ها اجدد شبابي واطلع اللوكائات التدوينية كولتها
اشرار اشرار
وبعدين ارحموا ضعفي النهاردة
قلبي اللي هو قلب خساية متألم ألم عميك على الشهداء العالمين
عااااااااااااااااااااااا

يالا ربنا يهنيكم واشوفكم كلكم يارب قريب
فرحانة جدا انك انبسطتي مع الرفيق الحاج ريتشارد والأولاد
ربنا يهني ايامكم ويجمعكم ما يفرقكم

تعالي اوشوشك
بس امانة عليكي ما تقولي للحاج
يابنتي احنا بنستغل اللوكائات دي ونهرب من الراجل والعيال ونجدد شبابنا ونغير عتب
بس يالا
انتي مستجدة ولسه متعرفيش قواعد المرأة المتوحشة :)

زعلانة جدا
كان نفسي اشوف رانيا القدر وانا
حبيبتي يا ناس على البعد ونفسي اشوفها موت
انا من هاذوه الموقع بقول لها ياروني هاتي مرمورة في اي لوكاء قاهري علشان انا وانتي ننقي رز والبنات يتعرفوا على بعض
عندي احساس انها ممكن تصاحب مانوسة وخاصة انهم بتوع فرانكو آراب :)
ريتشاردي
عاوزة فعلا اشوفك
وان شاء الله اشوفك قريب

richardCatheart يقول...

ELMOSTAFZ


لانك يمكن ماجربتش بس صدقنى المحبه دى جملها ان مافهاش اى مصلحه ودا جملها ونقائها
اتمنى مره تكزن معانا ان شاء الله
شرفتنى يا كرستيان

richardCatheart يقول...

ستيتة حسب الله الحمش

والله لسه مخلصه ماواويل المذاكره دى وعزراكى الله يقويكى انت تخلصى وتروحى منتج تتنجعى هناك ههههههه وتغيرى بقى

والله وانا تعبانه اوى بس قررت ابطل عياط وقولت اعمل حاجه واكسر الاحباط
وان شاء الله هاينفع انال متاكده انه هاينفع
بصى بقى ياستى انا مابستمتعش والحج مش معايا بجد والله حتى لو غصب عنه مش مهم المهم انى ابقى معه ببقى سعيده
والولاد كان لازم اجبهم منها فسحه ومنها فاتيما حبيبى تشوفهم

نانو القدر وانا اموره وشياكه ورقه وخفه والله والنوته قمرايه ماشاء الله
واشرف حبوب ربنا يحميه
فعلا ليكى حق تتمنى تشوفيها لانها حبوبه
وتتحب فعلا
وانا والله نفسى اشوفك جدا وانت تتكلمى وانا اسمع واتعلم ربنا يسهل ويكون عن قريب يارب
يارب يديم المعروف يارب

Ms Venus يقول...

قطتى

معلش اتأخرت عليكى غصب عنى

يووم جميل اوى ربنا يجمعكم دايما فى الخير والسعادة


ويارب كل ايامك تكون فرح يا احلى قطقووطة



ورداية لعيونك يا جمييلة

richardCatheart يقول...

Ms Venus

حقيقى كان نفسى تكونى معنا انت واكبر عدد ممكن من اخونا المدونين اللى بحبهم وبعزهم جدا
ربنا يخليكى يارب ويسعد ايامك ويجعلها كلها فرح

يا ريت تطق فى دماغك المره الجايه وتطلعى معانا

نورتينى جدا يافيو ويارب ديما

P A S H A يقول...

والله والله والله أنا مالاقي كلام أعبر بيه عن فرحتي باليوم الجميل ده

:))

ربنا يا رب يكرمكم كلكم ويجازيكم عننا ألف ألف خير ويجعله في ميزان حسناتكم اللهم آمين .. حقيقي ونعم الناس والصحبة بجد .. ربنا يديم المعروف بيننا ونتقابل في الخير دايماً إن شاء الله .

ســـلام خاص جـــداً جـــداً جـــداً
للسيد الفاضل الأستاذ / محمد زوج حضرتك عميد عائلة ريتشارد .. اللي بجد بجد بجد اتشرفت جداً بمعرفته .. إنسان فوق الوصف بجد .. واللي حضوره أضاف نكهة مميزة لليوم .. ربنا يكرمه يا رب ويبارك فيه .. وزعلان لإني ما سلمتش عليكم وقت الذهاب لإني كنت باصلي في المسجد .. بس الحمد لله إنكم وصلتوا بالسلامة

:))

سلامي الخاص لسمو الأدميرال / ميرو والبرنسيس / ميريهان أولاد حضرتك .. ربنا يا رب يفرحك بيهم ويبارك لك فيهم ويسترهم لك ويحفظهم لك من كل سؤ اللهم آمين


إن شاء الله تنورونا في القاهرة ونشيلكم في عينينا

:))

سلامي لكل أهل إسكندرية الكرام ..
يا أجـــدع نـــاس

:))

richardCatheart يقول...

P A S H A


اهلالالالالالالالالالالالالالالا شريف باشا ياسيدى دا الشرف لينا والله انت راجل فاضل واخلاق وكاتب مميز

ربنا يباركلك على كلام الطيب ياشريف
وسلامك وصل والكل بيسلك عليك والله وخصوصا الحج وميرو مانتو بقيت اصحاب بقى

يارب يديم المعروف يارب وديما نتجمع فى الخير ان شاء الله وعن قريب تعزمنا فى فرحك ويبقى تجمع جديد ان شاء الله

ربنا يكرمك يار ياشريف ويوفقك فى كل مجالات حياتك

كل الود والتحيه ليك