الأحد، 23 مايو 2010

أحنا بتوع الأتوبيييييييييييييييييييس

أحنا بتوع الاتوبيييييييييييييييييييس 

طل علينا بطلعته البهيه رجل الرياضه الاول فى مصر المش مهندس سمير زاهر يافرحه أمه به وهو بيعلمنا الأيمان والتقوى
 وبيقولنا أحمدو ربنا ياجدعان وبسوإداكم شعرودقن وأركعو ساجدين حامدين المولى على العقوبه الموجه من الفيفا
قمت جريت أتوضيت وصليت ركعتين شكر لله طبعا
ماحنا لازم نحمد ربنا فى السراء والضراء
وقلعت طرحتى ودعيت عليه دعوه وليا ساعة المغربية منك لله 
بعد كل دا طالع سيادتة يقولنا أحنا اللى ضربنا الأتوبيس ناسى أنه هو اللى  طلع وقال أزاى دا كلام ياسلام أحنا مانعملش كده أبداااااااااااا
بتاتا البتا أحنا ناس  زى الفل واللاعيبه هى اللى كسرت الاتوبيس من جوه 
وكلنا  شوفنا بعنينا على اليو تيوب وعلى القنوات بكل اشكلها وألوانها دا كان فاضل شويه  ويعملو فيلم تسجيلى
ألاتوبيس مافهوش  ازاز من جوه والسواق اللى طلع وقطع قلبنا وقال ضربونى وشتمونى وبهدلونى وراح قال كده فى النيابه
كل دا طلع هجص ودلوقتى ننوس عين أمه ياحلاوته طالع يقولنا أن الأتوبيس أضرب بالطوب من تلاته من الصبيا حسب تعبيره
الله ياعنى أنت كنت موجود بقى وشوفتهم تلاته ولا أنت اللى مأجرهم ولا أيه بالظبط؟
طيب انت كنت عارف أنننا اللى ضربنا ماقولتش ليه
علشان ناسنا اللى رايحه أم درمان تاخد بالها والناس تعمل حسبها
ويبقى الحدث حقيقى مش الكل بيتكلم لالالا احنا معملناش دا كله تلفيق معنى كلامك أنك كنت عارف
او
ودا بالنسبالى الاكيد انك ماتعرفش حاجه ومافيش ضرب للأتوبيس حصل من عندنا بس علشان انت أنسان مش قد المسؤليه
وماواركش حاجه غير انك تتصور لما المنتخب يكسب
وتاخد أوسمه ماعرفش ليه وكأنك أنت اللى كنت بتلعب وبتاكل النجيلا وماواركش غير الاحتفالات ماهو فاضى بقى ونجم سيته
طيب انت طلعتنا هباب واحنا بتوع الاتوبيس علشان تدارى على خبتك وتأخيرك فى تقديم شكوى مضاده فى حادث الاتوبيس
وخبتك الكبرى يا موكوس يااللى فضحتنا فى العالم بعد ام درمان
والناس كلها اتفرجت علينا وبردو ماعملتش حاجه ولا قدمت ورقه وحده 
غير قبلها  التسمم اللى حصل للاعيبه فى الجزاير وغيره وغيره
أنت رجل البيييييييييييييس الاول 
والاتو علينا أحنا المرادى
هما جربونا وعارفو اللى فيها وراحو ام درمان وهما عارفين
أنت ايه بالظبط
استفسارى لنفسى كان
امال كنت بتسافر بلاد بره عند الفرنجه فى سويسرا تهبب ايه
ومصاريف وفلوس بالهبل
وطبعا أجابه يرها أى كفيف
اه ماهى فرصه أمال النهب والسرقه هايرحو فين ولمين وتطلع السبوبه ازاى بدل سفر بقى وبدل تنقولات وبدل أكل وبدل شرب  مبلغ وقدره محترم 
وأحنا بناخد بدل خوازيق  والأسم أحنا المضروبين ستاتنا ورجلتنا اتهانو وأتفرج عليهم العالم من غير ماترفع صوباع
ومافيش ولا الهوا وولا الطراوا
وزاد الطين بلا الاعتذارات اللى بتسمع من الناس بقى
وشوبير يطبل ماهى شغلته
بس العيب مش عليك العيب على اللى شغلك كان فاضل ايه
علشان الكل يتحرك عياله وكانو هناك واتعملهم اقذر وأوسخ الحركات  وطلعو بعبعو شويه زيهم زينا فى القنوات وخلصت
كنت مستعجبه وانا بسمع علاء مبارك وهو بيقول لالالا كده كفايه لازم ناخد موقف 
الله انت بتقولنا احنا ماتروح تقول لبوك مش هو كبير القعده ولا ايه!!!!!

حاجه تفقع وتعل القرد أبو سديرى  وهى دى كنيه كل مسئول فى مصر طول ما انت مسئول غير مسئول فأنت هاتفضل فى موقع المسئوليه وهانفضل نلابس الطواقى لبعض ودا يرميها فى حجر دا ودا يرميها على راس دا  وتوه الحقيقه والحق كالعاده بس 
وبقينا بفضل كل المسئولين امثال سمير زاهر ملطشه فى كل مكان وزمان  من غير اى رد فعل والاكيد  أننا أحنابتوع
الأ تو  بيييييييييييس
بيييييييييييييييييييييييييييييييييب

هناك 37 تعليقًا:

Haytham Alsayes يقول...

طب انتي زعلانة ليه
ماحنا عارفين انه الاخ المش مهندس سبب الخيبة والويبة في الكورة والاخ فلان سببه في الزراعة والاخ الدكتور سببه في الصحة والاخ الاستاذ سببه في الصحافة

من الاخر منظومة فاشلة ويراسها الكابير
وربنا يستر طريقنا في الاتوبيييييييس

تحياتي ياقلب القطة

فتاه من الصعيد يقول...

أحنا بتوع الاستهبال والعشوائيه :)

تحياتي

ستيتة حسب الله الحمش يقول...

يعني قدرتي على زاهر وسيبتي الحمار والبردعة؟
انتي متخيلة يعني ايه انهم يعيشونا في كذبة كبيرة وصورة اعلامية مغلوطة مية في المية؟
يا ريتشاردي انا افتكرت حرب 67 وهم بيقولوا اننا وقعنا 100 طيارة واسرنا الاف مؤلفة واننا على ابواب تل ابيب
دول جزم وعملوا فينا عملة لا تغتفر
انتي قلعتي راسك؟
انا كنست عليهم السيدة :))

آخر أيام الخريف يقول...

سبقتينى للموضوع اللى كنت ناوية اكتب فيه ... عموما انا كنت متأكدة ان ده هيحصل ... الموضوع كله على بعضه كان شكله فيه حاجة ناقصة او ما اتقالتش

تحياتى

طالبة مقهورة ..درجة أولى يقول...

هيهيهيهيهيهيييييي

احنا اصلا شعب طيب وبيتضحك عليه..هتعملي فينا ايه بقى..هاتي شعب بداله!!

وبعدين اللي متعرفيهوش انقح من كده ان ابو تريكة عاوز يروح الجزاير عشان مش عارفة يعمل ايه هناك ويهدي النفوس بينا وبين الجزاير وعمو سمير بتاع البيس على رايك متضايق من ابو تريكة..يعني المفروض احنا بدأنا وهما ردوا علينا يبقى كده خالصين

انما ابدااااااااااا ازاي لازم نشعللها اكتر

بالذمة ده منظر دلوقتي لينا احنا كشعب

والله حاجة تكسف

ماما أمولة يقول...

عملتِ المدونة وهاتوجعي دماغك يا حبيبتي
وهاتطلعي كل اللي في قلبك وفي الآخر ولا حاجة
سياسة البلد دلوقتي سيبهم يقولوا اللي هم عايزينه وإحنا نعمل اللي احنا عايزينه
قولي معاية
حسبي الله ونعم الوكيل


سلام حبيبة قلبي

الشـوكة الــنـاعـمـة يقول...

مارو هانم طبعا زى ماانتى عارفه انا مااعرفش الاختراع اللى اسمه التلفزيون بس انتى دلوقتى تلفزيونى ونافذتى ع الاحداث
كلامك وصل لى الحدث
بصى مارو دى منظومه مختله بس متكامله اوى فى الفساد والاستهتار
دول ناس اكتر شىء ممكن يتفوقوا فيه
السلب والنهب امال اي امال البلد دى مين هايخف خيرها اللى عاملين نطلعه برا يدخل تانى جوه
صدقينى هما اجبن من انهم يسمعوا او يحسوا كلام زى ده
او انين وكسفه شعب من ورا استهترهم
بحبك اوى يا مرمر

richardCatheart يقول...

Haytham Alsayes

اه ياهيثم زعلانه من الفساد اللى خلاص وصل عينى عينك وان كان عجبكم ولا حد بياخد حق ولا باطل بس هاعمل ايه ادينى بفك عن روحى بدل مافرقع

تحياتى يارجل التاريخ الاول

richardCatheart يقول...

فتاه من الصعيد

ااااااااااااااه يابنت الصعيد

واى استهبال واى عشاوئيه بقو للركب
لغايه هنا منى جيب وحياتك ههههههه


نورتى يا بنت الصعيد

richardCatheart يقول...

ستيتة حسب الله الحمش


هههههههههههه لاء ازاى مانجبت سيره الحمار والبردعه بردو بس المره دى زاهر الديل
اللى بيوصل للحمار كل مره ديل مختلف والحمار واحد يازعيمه ههههههههه

اه اشتغلونا وهايفضلو ليوم الدين يشتغلو فينا هما وراهم ايه

والله لو اعرف كنت جيت اكنس معاكى
يمكن الدعوى تستجاب

ديما منورانى ياست الستات

richardCatheart يقول...

آخر أيام الخريف


وماله اكتبى بردو اكيد اسلوبك هايكون احسن وتوصلى اكتر اكيد ليكى نظره ورؤيه مختليفه
وايوا كنا متاكدين انها هاترسى على كده بس مش علشان مافيش حاجه ماتقالتش لاء علشان هو زى اى مسئول غير مسئول

نورتين ياصاحبه المدونه الجميله

richardCatheart يقول...

طالبة مقهورة ..درجة أولى

اه والله احنا شعب خساره فيهم


كمان ابو تريكه لالالا يبعد نفسه بقى العمليه مش ناقصه واحنا مش مستغنين عنه

والله الواحد بقى مش عارف مين اللى بداء ومين اللى رد

شكلنا ايه شعب عبيط بدل مابيتفرج على كرة بيتلعب به الكرة

نورتين ياست البنات

richardCatheart يقول...

ماما أمولة

اااااااااااااه ياماما اموله عارفه
ان كل المدونين اللى بيكتو فى الحاجات العامه بينفخو فى اربه مخرومه
بس هانعمل ايه ادينا بنفس عن روحنا
وبدل ماكنت بصوت لوحدى بقيت بصوت معاكم

بصوت عالى

وحسبى الله ونعمه الوكيل

تحياتى ليكى

richardCatheart يقول...

الشـوكة الــنـاعـمـة

شكشوكه الجميل الناعم
عارفه انك ماسمعتيش عن الاختراع اللى اسمه التلفزيون ههههههههههه وليا الشرف انى اكون نافذتك على الاحداث ولوانى نافذه تعبانه وعلى قدى بس كتر خيرك والله


ايوه منظومه متكامله فى الفشل فاسده فى الحق
لاء هما مش اجبن ياشوكه
هما سامعين وفاهمين وعارفين بس بالعربى اللى يقدرلهم على حاجه يعملها

وانا بحبك اوى ياشوكه ياجميله

أحمد الصعيدي يقول...

السلبية المفرطة واعتقادنا أننا الأخ الأكبر كلفنا المهانة



لنا الله

ولك الشكر سيدتي


شكرا علي الشكر الخاص

السلام عليكم ورحمة الله

richardCatheart يقول...

أحمد الصعيدي

كلامك فعلا صح وعشنا الدور وصدقنا وكل الدنيا بتعملنا على اننا الاخ اللى من سفاح وادى النتيجه

كل الشكر ليك على زيارتك اللى بتنورنى

وليك تحياتى

nasamat يقول...

لا بلاش ظلم بقى الراجل هيعمل ايه اكتر من كده
ايه يعنى غرامة مالية شوية ملاليم وحرمان من اللعب على ملعبنا اهو فشل جديد يضاف جمب اخواته
السؤال بقى ايه مصير الشكوى المقدمة على اللى حصل فى السودان وفين الملف اللى مايخرش الميه اللى مفروض اتقدم هو راخر ولا ده كمان اخد صفر اكبر من صفر المونديال
والله برافو عليهم الجزائريين بيشتغلو مش نايمين زمانهم مجهزين نفسهم تمام التمام لماتشات شبيبة القبائل مع الاهلى والاسماغيلى

صوت من مصر يقول...

ياه يا شيخه ياه بجد
عموما عموما كلمة هقولها ال 100 الف بتاع سويسرى انا وانت وغيرنا دفعنا فيهم كام
غير كده هو علاء مبارك مش مشجع وطنى صريح
وعلى رايهم
زى ما قال متقال " الريس " منتخبنا كويس
ههههههههههههههههههههههه
نصيحة مع انى بحب الكورة لكنى مؤمن اننا فشلة

richardCatheart يقول...

nasamat

ايون احنا ناس مفتريه احنا بعكنن على الناس الكومل الزوق الحلوه بنا ياخدنا احنا ويخليهم ربنا ينفخنا ويفسيهم


شكوى ايه سودان مين
لالالا ماهو البيه ماقدمش شكاوى اصلا
كان لازمن ولابد خلال 48 ساعه
احنا بقى استنينا اجازة العيد والدبح ونملا الكروش ونفت ونعيش فى التقليه

ياستى يجهزو ولا مايجهازوش خلاص الدنيا كلها مش محتاجه ماتش علشان تحط علينا
احنا لوقطه خلالالالالالالالاص

منوره يام الزعاريب والله وخصوصا انك تخصص رياضه ههههههه

richardCatheart يقول...

صوت من مصر

ياهلا ياهلا ياكيمو

دفعناهم كلهم وحياتك مليم مليم من جبنا

جمعيات الشباب الغلبان اللى عايز يتجوز والناس اللى عايزة شقق بد فاقد

عيلاء هو احنا خلفنا غير عيلاء ابو كلب حنين دا صريح صريح ووطنى وطنك
ههههههههههههه

والله ربنا يستر ومايوصلش للكرة احسن انتحر مافضلش غيرها
ربنا ينجحك يا شحاته ياخويا
احسن الاكتأب يقتلنى هههههههههه



نورتين ياكيمو فى اول زياره يارب ديما
ياصوت مصر المحبط

همس الاحباب يقول...

مع الاسف المنظومة باكملها فاشلة وفاسدة
ما حدث يعتبر وصمة عار فى جبين كل مصرى
مجرد الادانة فى حد ذاتها كارثة وفقدان لمصداقيتنا جمعيا
وما فعله مشجعى الجزائر فى السودان اصبح امر طبيعى ورد فعل عادى وهذا ما سوف يتبع معنا كمصريين فى كل الدول
لاننا مع الاسف ننتمى لمنظومة فاشلة فى كل شىء اداريا وسياسيا
ومبدا الشفافية منعدم فى كل مؤسساتنا فالنتيجة فشل ذريع فى الداخل والخارج
وتنويم مغناطيسى للشعب المصرى واثارة اعلامية وتضليل للراى العام وصورة مقزمة لنا فى الخارج
حسبى الله ونعم الوكيل
اما سمير زاهر ورفاقه يستحقون الرمى بالرصاص فى ميدان عام لان افعالهم وسرقاتهم من المال العام فاقت كل الحدود بل اصبحوا اشد خطرا على مصر فى الداخل والخارج
وما مصير بعثات الاهلى والاسماعيلى المشاركة فى بطولة افريقيا
هل نستوعب الدرس ام نصبح كالنعام
كفانا بكاء على اللبن المسكوب وننظر نظرة مستقبلية واضحة بعد استيعاب العظة والعبرة من احداث الماضى القريب
ولكن شتان ما بين ضمائر حية وبصائر اصابها العمى وانغمست فى الفساد والرشاوى فقط
حسبنا الله ونعم الوكيل
تحياتى لحضرتك واسف على الاطالة ولكن الموضوع جد خطير ويحتاج منا الكثير والكثير

Tears يقول...

يا بنتى كل المنظومة فاسدة ما جاتش على بتوع الكورة

Ms Venus يقول...

انا ماليش فى الكورة بصراحة يا قطتى


لكن يعنى ما كل اللى فوق كده هيجى عليه هو بس يعنى ؟


ورداية عسولة زيك ليكى يا قطتى

well يقول...

لا يا ستى انا غيرت الاتوبيس الحمد لله وبقالى اسبوعين بركب مترو ...وكمان بنزل جمال عبد الناصر علشان مبحبش مبارك .
مبروووك المدونة الجديدة ....
وبعدين انا عاوز اقولك ان كل مسؤل فى البلد دى بتاع كلام وبس يعنى ممكن يشتغل صحفى بعد الظهر او مذيع على ميلودى افلام .. وعلى واحد صحبى ..يا عم كلها بترزق

تحياتى

richardCatheart يقول...

همس الاحباب

ايوه يا خالد كل المنظومه من زمان فاسده

لغايه ماوصلت لأهانتنابره كنا بنقول هو جوه مستورين بس ريحتنا فاحت وبقى الكل بيلطش وخلاص بقت دى المعامله اللى بنتعاملها من الكل ورفعنا شعار انا مصرى اذا انا ملطشه
بس هما اتعلمو الدرس خلاص مش هايخلو حد يضربنا تانى هماشطار ههههههه

ربنا يستر من اللى جاى ياخالد
احلى تحيه واحلى سلام لخالد الجدع الهمام

richardCatheart يقول...

Tears

ايون فاسده لحد الرائحه الننتنه والعياذ بالله
حاسه فى نبرتك احباط ودا بيخوفنى لما الاقى اللى زيك محباطين
الزاهر المنظومه اللى بنحاول نهدها هاتدنا احنا ولا ايه؟

تحياتى يا ثأره

richardCatheart يقول...

Ms Venus

معقول مالكيش فى الكوره هههههههههه
ولا حتى المنتخب ههههههههههههه

بس على رايك هى جات على دى دا وصل لتوم وجيرى ياستى
ربنا يستر بس

تحياتى لاجمل صاحبه ورد

richardCatheart يقول...

well

والله جدع بس ايه رايك ماتنزل السادات احسن ولا بعيد عليك يمكن ربنا ينصرنا هههههههه

لالالا مالكش دعوه بمولدى هاتقطع على حمزاوى
كلها سبوبه يا ويل وخليهم ياكلو عيش واحنا بناكل على قفانا

الله يبارك فيك انت اللى منور الدنيا والله
وان شاء موجود معانا ديما ربنا يهديلك اليكترونياتك
نورتنى

من كل بستان زهرة يقول...

قلب القطه
أنا موقعي هذا بعلن عدم معرفتي بيكي وعدم مسئوليتي عن أي كلمة بتكتبيها

معناها أنا ندله وببيعك عند أول محطه
ههههههههههههههههههه

أيه يابنتي بتحرقي في دمك ليه
ماهو ده سمير زاهر من زمان
ماأحنا كل ما نروح بلد من بتوع شمال افريقيا من زمان وأحنا بنضرب
ولا عمرنا حد خدلنا حقنا

معلش أحنا بنتبهدل
عديها عديها

وكل أتوبيس بيكسر وأحنا طيبين

Wanda يقول...

يعنى احنا ضربنا الاتوبيس؟؟
طيب و لو حتى عيال حدفت الاتوبيس بالطوب ليه النار ده كلها؟؟؟

انا ياما كنت راكبة موصلات و عيال شوارع كانوا بيتعلموا النشان فى شبابيك المترو و الاتوبيس علينا

يعنى مظهر مصرى عادى على حد علمى
فى امريكا كان راجل و ابنه بيتعلموا النشان فى الناس و الاتوبيسات من بعد

ليه النار الى ولعت ؟؟ و مين الى كسب منها فى الاخر ؟؟؟

و بعدين ليه الطيارات المليانة الى راحت السودان ؟؟ من امتى التشجيع الجامد قوى ده؟؟ و فنانين ؟؟
مين الى كسب من النار ديه كلها؟؟

محدش حيجاوب على السؤال ده ؟؟ قريب و لا بعيد؟؟

Wanda يقول...

قطة
ايه ملحوظة الصحفراء الصفراء الى على جنب ديه ؟؟ قصدك مين ؟ مفهمتش

richardCatheart يقول...

من كل بستان زهرة


كده بردو ياناعمه وقويه وكلها حنيه

تبعينى مع اول شلوط ماشى يافلورا يابنتى هههههههههههههه

اه يافلورا المفروض نعرف انها خلالالالالالالالالاص جابت من الاخر والله

ايون احنا بنتبهدل
نورتينى ياقمر

richardCatheart يقول...

Wanda

انا معاكى انه سلوك موجود عندنا وعند بلاد تانيه كمان

ليه التشجيع الجامد والفانين وكل دا
اهو افورا فى الفرحه وهبل واعتبار وصول مصر كاس العالم هدف قومى بدل مايتجمعو
ويخلو التعليم ولا الصحه هدف قومى

بس انا متابعه من الاول الولعه جات مش من عندنا يا وندا الولعه ابتدت لما لما نزلو صور لاعيبتنا على اجسام الممثلات وحسن شحاته لابس عروسه

السؤال وايه لازمه الطيارات اللى ملاينه مجرمين اللى جات والماتش شغال
دول اللى كان لازمتهم ايه

المستفيد بقى
طبعا السياسين مصالح عليا فى حاجه غلط
وفى ايد لعبه فى الحكايه دى
منوارنى يا واندا

richardCatheart يقول...

Wanda

قصدى كل انسان زى الجريده الصفرا

ماورهوش غير النميمه والتقسيم على الناس والضحك عليهم اول مايدوله ضهره

واللى بيته من ازاز مايحدفش الناس بالطوب

لاننا كلنا عندنا ازاز فامينفعش نحدف الناس بالطوب

وفى الحقيقه انا كلامى موجه لشخصيه بعنها وهى عارفه نفسها


شكرا يا واندا يارب منورانى على طول

كلام على بلاطة يقول...

السعادة تتواجد فى عقل السعيد لا فى الواقع الجميل المجيد/

فكم من سعيد لا يملك من مقومات السعادة من قديم او جديد/

وعايش متهنى ولا يملك الا البساطة وكل شىء عنده مفيد/

بالبشاشة والسماحة والرضا شايف كل يوم من ايامة عيد/

ويرى ما ينقصه من ضروريات كتمرين من العاب الحديد/

تزيده لياقة وصحة وعقل سليم فى جسم حليم وكل له رصيد/

ومن يحمد الله ويشكره على القليل يبارك الله فيه وينمو ويزيد/

فاسعد نفسك بنفسك وخليك كل يوم شخص متفائل بفكر فيه تجديد/

كلام على بلاطة يقول...
أزال أحد مشرفي المدونة هذا التعليق.
richardCatheart يقول...

كلامك جميل وعلى بلاطه


نورتنى