الاثنين، 31 مايو، 2010

صايع بحر




احلى تحيه واحلى سلام لكل حبيبنا اللى شرفونا
يوم من اجمل الايام اللى عشتها فى بلدى اسكندريه
انضم لايام الذكريات الحلوه اللى ماتتنساش ابدااااا

قابلت ناس صحيح اول مره اشوفها وجه لوجه بس فعلا كانى
عشت معاهم كتير واعرفهم من زمان فى ناس حتى مدخلتش عندهم قبل كده وماكنتش اعرف مدونتهم بس ان شاء الله التواصل  معاهم هايبتدى ويستمر  والله قابلت ناس فى منتهى الجمال والذوق والجدعنه ودا مش غريب لانهم متعودين يتلمو فى خير ديما

فى بدايه اليوم وصلت انا والحج ريشارد والولاد بدرى عن معياد وصولهم بنص ساعه كلمت خالد همس الاحباب الجدع قالى احنا وصلنا عند مكتبه اسكندريه وجاين بصراحه انا محرومه فسح وخروج فاقولت استغل الموقف واتصور بقى على الحب حبيبى 
اللى ماكنتش شوفته من مده بسبب الدراسه والوقت
وصلت شله ناس من بعيد قولت للحج  الجماعه اهم وفعلا خالد رفع الموبايل يتصل بيا وهو بيبصلنا من بعيد شاكك فينا ههههههه
ورحنا سلمنا كانو الموجدين 
خالد همس الاحباب الجدع
فاتيما تيما حبيبه قلبى ام يوسف
الانسه اللاموره انجى
شريف باشا انسان مهذب زى ردوده قليل الكلام بس خفيف الظل
وابتسمته طيبه وجميله
مصطفى ريان اللى بيتكسف جدا مهذب وطيب ودمه شربات
وكاتب مميز زى ماعرفت
احمد بيه هادى جدا ماتكلمش تقريبا كتير بس فعلا ذوق وسمح الوجه وبردو بيتكسف 

ضياء بيوتيفل مايند انسان جميل ومثقف وغاوى غزو ثقافى
بيشتركو كلهم فى صفه واحده انهم ودودين جدا فعلا

السلام الاول كان عادى واول ماتيما عرفت انى قلب القطه وانا عرفت انها تيما نطينا فى حضن بعض وهاتك يابوس وتفعيص بالاحضان زى ماوعدنا بعض كانى عارفها من زمان والله 
اموره وحبوبه ومع الوقت عرفت انها تستاهل كل حب الناس ربنا يديمه عليها يارب
كلنا فرحنا جدا بالقاء وهما فرحو بالولاد جدا بصراحه ودا اسعدنى ولاول مره ابقى ماشيه فى الشارع مش قلقانه على الولاد لان الكل كان عنيهم عليهم وبيراعوهم ومهتمين بيهم جدا
مش بقولكم ناس جدعه اووووى



قررنا ندخل القلعه نلبسها وكان القرار التاريخى وفعلا دخلنا 
وابتدى ابتدى ابتدى المشوار ودخلنا سراديب القلعه وغرفها
وكلنا فى تعليقات ساخره فى محاوله فاشله منى بأقناع الحج ريتشارد بجمال الاثار والطوب الحجر وهو يقولى جمال ايه دا شبه بيت ستى الكبير الله يرحمها وكل تركيزه ان لو القلعه دى تتهد ويطلع بدلها مساكن للشباب او حتى يأجروهالم زى ماهى 
يكون احسن اهو نستفيد منها بدل وقفتها فى الشمس من غير 
 لازمه 


وطبعا كان فى معانه فى طلو السلالم ومعانه اكبر فى نزلها السلمه ماشاء الله ست ادوار وكان سؤلنا ياترى الناس كانت رجلها طول ايه علشا يطلعوها واللى يقول اصل الاسمنت كان ببلاش اللى يقول ماكنش فى احمد عز هههههههههه 
اهو ماقولتش اسامى ماهنتوش عليا بردو
اتصورنا صور كتير كلها جميله بس هاكتفى بصور القلعه بعد مالبست لان دا سبق صوحافى 


وبعد مانزلنا ابتدت ناس حلوه تانيه تيجى 
دودو نبضات قلب ولهان  جدعه وسكره اوووووى ربنا يسعد قلبها
حنين القلب ام عمرو جميله وبردو جدعه جدا وميرو ابنها الجميل ربنا يخليه لها ويفرحها به  ماشاء الله عليه قمر انن كده يتاكل
انا موت فيه هو تعب معانا بس اكيد اتبسط زينا
 حنان القمر ربنا يقومها بالسلامه وتجبلنا رودينا عروسه عمر بخير يارب طيبه وسمحه بجد


مى رحيق الورد اللى فاجاتنى بهدوئها وانها حبوبه جدا وبقت صاحبه مريهان هى وانجى جدا ربنا يفرحنى بيهم يارب
واسماء نبض اسكندريه السكره هاديه بردو جدا بس حبوبه ودمها خفيف
وداليا ماى كورنر فى منتهى الذوق والود وزعلت منها انها ماجبتش الولاد معها ربنا يخلوهملها وتفرح بيهم ست سكره
الناس دى جات بعد مالفينا القلعه  وكانو عايزين يلفو تانى بس للاسف الوقت ماكانش معنا اقنعناهم انها شويه حجاره وعيب على الاسكندرنيه يقولو اننا ماشوفنهاش هههههههههه المهم اقتنعو


وقررنا نطلع نتمشى لحد الزعيم وهنا اتفرقنا اجزاء 
جزء اختفى احمد ومصطفى وانجى وشريف باعونا ورحو ياكلو
ههههههههههه واحنا طلعنا على الزعيم وهناك كانت القعده الحلوه احتلينا المطعم وهاتك ياكلام  وضحك وتهيص وشربنا
مشروبات وضربنا السندويتشات اللى كنت عاملها الحمد لله 
انهم استحملوها  وبعد حبه مصطفى ريان ظهر وقعد معانا


وحصلتى احلى مفاجاه وانا بتكلم مع خالد انى كان نفسى ستيته ست الستات تيجى واشوفها كان رد فعله غريب وفرحنى اوى
وهو بيقولى  انت فيكى كتير منها كلامها وشكلها وطريقتها 
بصراحه اتبسط اوىىىىىىىىىىىى لانها من الناس اللى ليهم معازه خاصه عندى جدا وطبعا كعاده خالد الجدع عمل حركه اجمل ماتكون واتصل بيها يسلم عليها وكان ليا الشرف انى اسمع صوتها الجميل زى كتابتها والصوت الحلو وخفه الدم اللى سمعتها هى اللى تطلع الكتابت دى فعلا
وانا بقولها خالد بيقول عليا فيا منك ضحكت وقالتلى مش انت اسكندرنيه وانا بورسعديه ياعنى سلملى على البحر المتوسط
جمييييييله ماشاء الله عليها ربنا يطمنها على عفرتو وعلى امورتنا والثانويه العامه يارب ويفرح قلبها وان شاء الله القا قريب
ياست الستات ويكن لى الشرف والله

وحظى الحلو خالانى اسمع صوت ندى الياسمين السكره بنت المنصوره اجدع ناس وهى وعدتنى ان زيارتنا هاتكون فيها برمات اهو بدبسك ياندى هههههههههه كان لى الشرف انى سمعت صوتك والله



وكانت المفاجاه اللى كنت ماعرفهاش وهى احتفالهم بعيد ميلاد فاتيما كان نفسى يقوللى علشان اجبلها تذكار تفتكرنى به
اتعملنا قعده جميله بره فى الهواء الطلق وانضملنا ناس حلوه تانيه

نانو القدر وانا ست فاضله كريمه واموره وبنوتتها الاموره  اللى عيبها الوحيد انها زمالكاويه
بس هى عثوله مش مهم بقى انها زمالكاويه انا حبتها وخلاص
واشرف الامور الانن اللى ميرو حبه جدا ولعب معه

وحنان الشافعى البنوته الاموره ام عيون دباحه حتت بنت سكره
ربنا يفرحنى بيها
وظهر شريف باشا واحمد بس ضيا كان لسه فى حاله غزو ثقافى فى المكتبه 
واحتفلنا بعيد الميلاد وسط الغنى والفرحه وفاتيما مبسوطه وكسوفه بس هى تستاهل   بجد والله كل خير ربنا يفرحنا برجوع يوسف ليها ويفرحنا بيها يارب 



وحبه بعد الكلام والضحك والهزار والكلام الطيب انضملنا

وليد الدوغرى شاب جميل والله زى كل اللى كانو معانا انا استجدعته جدا خفيف الدم وابن بلد وبيفهم ولسانه طويل زيى هههههههه اتكلمنا مع بعض واتشرفت به هو من الناس اللى ماكنتش اعرفها ولا بدخل عندها بس خلاص بقينا اخوات
وعلى طول هاتواصل معه ان شاء الله

وانضملنا احمد بدراوى اللذيذ وهبه خميس العثوله اللى بجد نورونا وسعدت بيهم اوى

وقررنا نضرب بنطه  او بولطه فى البحر حسب ماكل واحد بيقولها لان اختلف فيها التقاويل ههههههه
ووصلنا لحد الريس المركبى واتفقنا معه وهنا انضمتلنا  العشره الحلوه 
زهراء او بطه زى ما انا متعاوده اقولها اتبسط جدا انى شوفتها
بقلنا سنه وست شهور نفسنا نتقابل واخيرا اتقبلنا زى ماكانت ولازالت سكره يابطتى هههههههههه ربنا يفرحنا بيكى يارب 
ويسعد قلبك



لكن للاسف بطه ومى وحنان عندهم دوار البحر فاقررو يستنونا
وهنا ظهرت شهامه ولاد البلد الجدعان وليد اتنازل عن الفسحه البحريه علشان مايسبش اخواته البنات لوحدهم فى الشارع
واستنى معاهم  يا مشرفنى يا وليد

طلعنا كلنا المركب ولفينا ساعه فى البحر مع الغنى والتصقيف والزغاريت والصور وكانت من اجمل الساعات فى اليوم بجد







خلصنا المركب واتجمعنا بره تانى كلنا وقررنا نرجع الزعيم ناكل بقى ونرتاح وفعلا روحنا اتغدينا كلنا  وطبعا كلام وحورات
مع وليد وبطه تموت من الضحك كلنا اتبسطنا جدا الحمد لله
وقررنا نطلعو على المرسى ابو العباس  علشان الناس تصلى
ونرحو المراجيح  وطبعا العيال عيالى كانو عاشمنين فى المراجيح اوى بس 
هنا بقى الحج قال يلا والحج امر وامر ياجميل مرك ماشى 
كتر الف خيره الراجل  خلانى اقضى يوم من اجمل ايام حياتى
وسلمت على الناس الموجوده بس للاسف مش كلهم لان فى ناس كانت راحت تصلى وناس بتشترى حاجات
فادى فرصتى اسلم عليهم واقولهم انتم كلكم من احسن الناس اللى عرفتهم بجد ومن غير مجاملات والله 
الناس اللى ماسلمتش عليهم
شريف باشا انت بجد طيب ومحترم وبشكرك جدا على تعبك معيا ومع ميرو والاسكوتر ويارب افرح بيك
خالد همس الاحباب الجدع ربنا يباركلك فى همس وشابى ومامتهم
وينوركلك حياتك
حنين القلب ياجدعه ربنا يباركلك فى عمر وتشوفيه عريس
اكيد هانتقابل قريب ان شاء الله
حنان ام رودينا ربنا يطمنى عليكى
اسماء نبض اسكندريه ربنا يفرحنى بيكى يارب
ولكل الناس اللى كانو معانا ولحقت اسلم عليهم ليكم كل حبى وحب عائلتى الصغيره
هى كبرت بيكم كلكم والله
الناس اللى كان نفسى اشوفها
ستيته ست الستات
علا لالا صيدالانيه 
بنت خيخه نوران
ندى الياسمين
اللقا نصيب ويارب يكون ليا نصيب اشوفكم
واتقابل معاكم يكون ليا الشرف

البحر بيسلم عليكم كلللللللللللللللللللللللللللللللللكم







الأربعاء، 26 مايو، 2010

جايه أصالحك



جايه أصالحك

أوعى تكون نويت خلاص تنسى اللى بنا كان

دا أحنا كلمه حب حلوه من زمن قبل الزمان

فاكر لما أحط راسى جوه حضنك الأمان

وباديك تحضن أديا وف عنيك بحر الحنان

ولا ناسى ؟  أيوا ناسى !

يبقى شكلك لسه زعلان

طب اقولك ايه كمان

أن عمرى قبلك بعدك مايساويش

أنت ضهرى وأنت سندى

 غيرك أنت لاء ماليش

ولا أقولك اه بحبك أيوا حقك

ماأنت كنت ليا ايد م الهوا تحوط عليا

وأنت قلب دافى كل يوم يحس بيا

وأنت لمسة ود حلوه تمسحلى دمعة عنيا

ايوااااااااا أضحك وأفضل اضحك

ضحكتك بالدنيا ديا بسمتك دى نور عنيا

وانسى زعلنا اللى كان مش بقولك

أحنا كلمه حب حلوه من زمن قبل الزمان

الأحد، 23 مايو، 2010

أحنا بتوع الأتوبيييييييييييييييييييس

أحنا بتوع الاتوبيييييييييييييييييييس 

طل علينا بطلعته البهيه رجل الرياضه الاول فى مصر المش مهندس سمير زاهر يافرحه أمه به وهو بيعلمنا الأيمان والتقوى
 وبيقولنا أحمدو ربنا ياجدعان وبسوإداكم شعرودقن وأركعو ساجدين حامدين المولى على العقوبه الموجه من الفيفا
قمت جريت أتوضيت وصليت ركعتين شكر لله طبعا
ماحنا لازم نحمد ربنا فى السراء والضراء
وقلعت طرحتى ودعيت عليه دعوه وليا ساعة المغربية منك لله 
بعد كل دا طالع سيادتة يقولنا أحنا اللى ضربنا الأتوبيس ناسى أنه هو اللى  طلع وقال أزاى دا كلام ياسلام أحنا مانعملش كده أبداااااااااااا
بتاتا البتا أحنا ناس  زى الفل واللاعيبه هى اللى كسرت الاتوبيس من جوه 
وكلنا  شوفنا بعنينا على اليو تيوب وعلى القنوات بكل اشكلها وألوانها دا كان فاضل شويه  ويعملو فيلم تسجيلى
ألاتوبيس مافهوش  ازاز من جوه والسواق اللى طلع وقطع قلبنا وقال ضربونى وشتمونى وبهدلونى وراح قال كده فى النيابه
كل دا طلع هجص ودلوقتى ننوس عين أمه ياحلاوته طالع يقولنا أن الأتوبيس أضرب بالطوب من تلاته من الصبيا حسب تعبيره
الله ياعنى أنت كنت موجود بقى وشوفتهم تلاته ولا أنت اللى مأجرهم ولا أيه بالظبط؟
طيب انت كنت عارف أنننا اللى ضربنا ماقولتش ليه
علشان ناسنا اللى رايحه أم درمان تاخد بالها والناس تعمل حسبها
ويبقى الحدث حقيقى مش الكل بيتكلم لالالا احنا معملناش دا كله تلفيق معنى كلامك أنك كنت عارف
او
ودا بالنسبالى الاكيد انك ماتعرفش حاجه ومافيش ضرب للأتوبيس حصل من عندنا بس علشان انت أنسان مش قد المسؤليه
وماواركش حاجه غير انك تتصور لما المنتخب يكسب
وتاخد أوسمه ماعرفش ليه وكأنك أنت اللى كنت بتلعب وبتاكل النجيلا وماواركش غير الاحتفالات ماهو فاضى بقى ونجم سيته
طيب انت طلعتنا هباب واحنا بتوع الاتوبيس علشان تدارى على خبتك وتأخيرك فى تقديم شكوى مضاده فى حادث الاتوبيس
وخبتك الكبرى يا موكوس يااللى فضحتنا فى العالم بعد ام درمان
والناس كلها اتفرجت علينا وبردو ماعملتش حاجه ولا قدمت ورقه وحده 
غير قبلها  التسمم اللى حصل للاعيبه فى الجزاير وغيره وغيره
أنت رجل البيييييييييييييس الاول 
والاتو علينا أحنا المرادى
هما جربونا وعارفو اللى فيها وراحو ام درمان وهما عارفين
أنت ايه بالظبط
استفسارى لنفسى كان
امال كنت بتسافر بلاد بره عند الفرنجه فى سويسرا تهبب ايه
ومصاريف وفلوس بالهبل
وطبعا أجابه يرها أى كفيف
اه ماهى فرصه أمال النهب والسرقه هايرحو فين ولمين وتطلع السبوبه ازاى بدل سفر بقى وبدل تنقولات وبدل أكل وبدل شرب  مبلغ وقدره محترم 
وأحنا بناخد بدل خوازيق  والأسم أحنا المضروبين ستاتنا ورجلتنا اتهانو وأتفرج عليهم العالم من غير ماترفع صوباع
ومافيش ولا الهوا وولا الطراوا
وزاد الطين بلا الاعتذارات اللى بتسمع من الناس بقى
وشوبير يطبل ماهى شغلته
بس العيب مش عليك العيب على اللى شغلك كان فاضل ايه
علشان الكل يتحرك عياله وكانو هناك واتعملهم اقذر وأوسخ الحركات  وطلعو بعبعو شويه زيهم زينا فى القنوات وخلصت
كنت مستعجبه وانا بسمع علاء مبارك وهو بيقول لالالا كده كفايه لازم ناخد موقف 
الله انت بتقولنا احنا ماتروح تقول لبوك مش هو كبير القعده ولا ايه!!!!!

حاجه تفقع وتعل القرد أبو سديرى  وهى دى كنيه كل مسئول فى مصر طول ما انت مسئول غير مسئول فأنت هاتفضل فى موقع المسئوليه وهانفضل نلابس الطواقى لبعض ودا يرميها فى حجر دا ودا يرميها على راس دا  وتوه الحقيقه والحق كالعاده بس 
وبقينا بفضل كل المسئولين امثال سمير زاهر ملطشه فى كل مكان وزمان  من غير اى رد فعل والاكيد  أننا أحنابتوع
الأ تو  بيييييييييييس
بيييييييييييييييييييييييييييييييييب

الخميس، 20 مايو، 2010

مافيش واجب



مافيييييييييش واجب

حب الوطن فرض عليا افديه بروحى وعنيا

تاج على راسى 
 
                                                   

ليه  دا بالتحديد؟
علشان ابويا كان من جنود النكسه وعارفه حصل ايه ورضعا من يوم ماتولدت
ودم الاسرى زميله على كتفنا تار والمفرض اننا مصرين

وانت وغيرك ياعنى اللى بتعملو دا ليه فايده اهو كلام فى الهوا؟

يمكن صحيح مش هايرجع اللى راح او مش هايجيب حقوق ضايعه بالرغم انها جريمه وضحه وضوح الشمش فى شهر اغسطس بس لانى عندى عيال 
وعايزهم يتفرجو ويعرفو زى ما انا عرفت وفهمت ومش بس كده لاء عايزه عيال غيرى يعرفو


ومش بس كده لاء عايزة اكتر البوستات اللى  بتتكلم عن نفس الموضوع دا تفكر اللى ناسى فى الزحمه ومولد اليله الكبيره

 ولما يتفرجو ياعنى هايحصل ايه؟
هازرع فيهم مين عدوهم الاول وعايز ايه وبيبصلنا ازاى وليه واعرفهم اد ايه هو ندل جبنا معندهوش ضمير زى مابيعلمو ولدهم وزى ماكنو بيخلوهم يكتو اساميهم على الصواريخ وقت ضرب غزه



وهى ليه الدوشه مالحكومه دى شغلتها تجيب حقوق اللى راحو ولا انتم لازم تدوشونا؟
وههههههههه الحكومه اللى مش قدره توفر رغيف عيش نضيف مش قدره تعمل بلاليع للشتا وبتسبنا نغرق
ومش قادره توفر مدارس محترمه لعيالنا وتعليم عدل
ومش قادره تعملنا مستشفيات بشريه
ومش قادره تاخد حق الناس اللى اتهانت فى ام درمان
وسبتنا نطلع احنا الوحشين السفاحين ومش بعيد نطلع احنا اللى ضربنا نفسينا يبقى عندها موضوع الاسرى دا قمه الرفاهيه
    انت مش شايفه انكم مكبرين الموضوع وانه خلاص مر عليه سنين؟
ايوه مر عليه سنين ودى النصيبه لان لو كنا اخدنا حقنا والعالم كله اتفرج وعرف اننا مابنسبش حق اولادنا ماكناش وصلنا للى احنا فيه كل يوم قتل لمصرى او اهانه بتتطلع اؤادم العالم فى ابشع صورها لاحنا بنصعب على نفسنا والعالم معبرنا

مش قادره انسى منظر عنين الظابط امين وهو بيتكلم فى الجزء الاول بيقول طنطاوى والريس لو عرفو اننا اتسرحنا ب18 جنيه وادونا استماره سته مش هايرضيهم عنيه فيها خزى وهو مش عايز يصدق بالرغم انه عارف من جواه انهم مايسوش عندهم مش عايز يصدق ان حياته اللى قدمها على طبق من دهب مالهاش تمن ولا ليها اهميه اه بقوله
انت تساوى عندهم 18 جنيه للاسف والجنود الاسرائلين بيخدو اوسمه وبيعيشو حياه كريمه بس عزائى الوحيد انك مش لوحدك كلنا بقى مالناش قيمه

 سكه السلامه

شكرا لندى الياسمين للمساعده فى تنزيل الفديوهات





الثلاثاء، 18 مايو، 2010

السيد أنور أبويا



هفضل أدعى لرب الكون
يرحم أب بقلب حنون




أصل السيد أنور أبويا
كان أنسان كان فنان

يعرف يرسم بالالوان
لون لينا الدنيا بأجمل لون


كان على طول يشد
أديا قومى يا مارو

صلى معايا لرب الكون

حاضر يابا هفضل اصلى لرب الكون

يرحم أب بقلب حنون




أصل أبويا كان فى
الأصل جندى محارب

شاف فى الحرب هم وكرب
عجب وتجارب

وفضل شايل روحة بكفة بقلب
جسور فى طريقة مش هايب



وهو بيدعى رب الكون
ينصر مصر منين ما تكون

حاضر يابا هفضل أدعى لرب الكون

ينصر مصر منين ما تكون

ويرحم أب بقلب حنون




أصل السيدأنور أبويا
كان أمور كان غندور

إيما وسيما وسمعه كريمة
كل الناس تتكلم عنه كان مشهور

كانت قمتة وسمتة ف عهده
أصل الراجل كلمة عهد مش مسطور




هفضل يا با مبهورة بيك
وفخورة بيك مشتاقة ليك

وهفضل أدعى لرب الكون
يرحم أب بقلب حنون


بحببببببببببببببببك يابابااوىىىىىىى